Samhengi býður velkominn Atla Ingólfsson föstudaginn 7. nóvember. Á fyrirlestrinum viðrar Atli ýmsar hugleiðingar um texta við söngva og dægurlög, hvað ber að forðast, hvað ber algerlega að forðast og hvað ber umfram allt, skilyrðislaust, að forðast. Fyrirlesturinn er í formi nöldurs, en löng hefð er fyrir því að karlar eins og hann nöldri um popplagatexta. Þetta er þó aðeins nöldur að forminu til: Ætlunin er fyrst og fremst að gefa gagnleg ráð um textagerð.

Atli Ingólfsson hefur alla tíð fengist talsvert við skrif í lausu og bundnu máli. Á unga aldri gaf hann út ljóðabók, samdi eða þýddi nokkra texta og er nú við það að gefa út bók með ljóðaþýðingum. Hann hefur ritað um íslenska bragfræði í tímaritin Skírni og Són og vinnur að grein um ljóðstafasetningu í íslenskum brag. Hann hefur þýtt fjölda texta eftir franska söngvaskáldið Jacques Brel og flutt þá í gervi Baldvins Orwes.