Sviðslistadeild

Meginmarkmið deildarinnar er að styðja nemendur við að þróa og dýpka listræna færni; sameina handverk, gagnrýna hugsun og fræðimennsku við það besta úr samtíma sviðslistum. Nemendur útskrifast að loknu námi tilbúin til að móta sviðslistir framtíðarinnar. Útskrifaðir nemendur sviðslistadeildar gegna leiðandi hlutverki innan innlendra og alþjóðlegra sviðslista, sem og á mörgum öðrum sviðum; allt frá flytjendum til fræðimanna, leikhússtjóra, framleiðenda og höfunda.

Sýningar og viðburðir eru mikilvægur partur af námi í sviðslistadeild. Þar má nefna opnar kynningar á afrakstri námskeiða og samstarfi ólíkra námsleiða, auk einstaklingsverkefna og lokaverkefna allra brauta deildarinnar. Sýningar geta tekið form hefðbundins leikhúss, leiklestra, dansverka, sýninga í óhefðbundnum leikrýmum, gjörninga, útvarpsleikrita, þátttökuverka o.m.fl. Auk þess eru reglulega haldnar málstofur og málþing um fagleg málefni sviðslista.

Alþjóðlegt samstarf er stór hluti af starfi deildarinnar og gefst nemendum kostur á að fara í skiptinám og/eða starfsnám erlendis. Skiptinemar og kennarar frá erlendum menntastofnunum eru tíðir gestir í skólastarfinu og deildin er þátttakandi í ýmsum alþjóðlegum samstarfsverkefnum.

Sviðslistadeild á í samstarfi við helstu sviðslistastofnanir og hátíðir í landinu eins og Þjóðleikhúsið, Borgarleikhúsið, Leikfélag Akureyrar, Íslenska dansflokkinn og Reykjavík Dance Festival og einnig í góðum tengslum við sjálfstæðu sviðslistasenuna.

Í sviðslistadeild er boðið upp á fjórar námsleiðir: leikaranám, alþjóðlegt samtímadansnám, sviðshöfundanám og meistaranám í sviðslistum. Nám til bakkalárgráðu er þriggja ára nám, 180 ECTS einingar, en nám á meistarastigi er til tveggja ára, 120 ECTS einingar. Inntökupróf er inn á allar námsleiðir deildarinnar. Þriðja hvert ár eru ekki teknir inn nýir nemendur í sviðslistadeild á BA stigi.