Sviðshöfundanám BA

Til að umsókn sé fullgild þarf að borga umsóknargjald og eftirfarandi gögn þurfa að berast Listaháskólanum: 

1. Staðfest afrit af prófskírteinum. (PDF) (Skylda) – athugið að ljósrit gildir ekki.
a) Skannið frumrit af prófskírteinum og hengið við rafrænu umsóknina, eða
b) Fáið staðfest afrit af prófskírteinum með stimpli frá viðkomandi skóla, skannið og hengið við rafrænu umsóknina. 

 2. Ljósmynd af umsækjanda. (Skylda) Henni er bætt við undir „Önnur skjöl“.

 3. Kynningarbréf. (PDF) (Skylda) Því er bætt við undir „Kynningarbréf”. 

Umsækjandi skal tilgreina ástæður umsóknar, markmið, framtíðarsýn og fleira í stuttum texta, hámark 2 blaðsíður. Umsækjendur skulu taka afstöðu til eftirfarandi spurninga í kynningarbréfi:  

• Hvað er það við sviðslistir sem kveikir áhuga þinn og ástríðu?   

• Hvers vegna langar þig að verða sviðshöfundur?  

• Hvað viltu fá út úr náminu á sviðshöfundabraut?  

4. Mappa/Portfolio. (Skylda)  Umsækjendur skulu safna sýnishornum af verkum sínum saman í möppu/portfolio.  

Mappan skal innihalda að hámarki fimm sýnishorn, sem eiga að endurspegla umsækjandann, varpa ljósi á áhugasvið og helstu hugðarefni hans. Úr sýnishornum á að vera hægt að lesa listræna hugsun umsækjanda og getu hans til framsetningar á hugmyndum sínum.  

Í raun rúmast allt innan möppunnar sem að mati umsækjandans sjálfs getur með einum eða öðrum hætti lýst því sem hann vill koma á framfæri um hæfni sína, bakgrunn, listrænan áhuga og persónuleika. Sem dæmi um innihald möppunnar eru: sýnishorn af gjörningum eða atriðum, brot úr sviðsverkum eða stuttmyndum, brot úr skrifuðum texta eftir umsækjanda, s.s. leikritum eða kvikmyndahandritum, kaflar úr ritgerðum, brot úr ljóðum og sögum eða upptökur með sýnishornum af verkum.   

Athugið að ekki er óskað eftir verkum í fullri lengd og umsækjendur eru hvattir til þess að velja fremur styttri hluta af lengri verkum svo inntökunefnd hafi færi á að fara yfir öll gögn í ferilmöppum umsækjenda.   

Hægt er að skila möppu/portfolio með þrennum hætti:  

1. Umsækjendur skila inn möppu á skrifstofu Sviðslistadeildar Listaháskóla Íslands, Laugarnesvegi 91, 105 Reykjavík. 

1. Umsækjendur skila inn möppu með pósti stílað á: Listaháskóla Íslands, Laugarnesvegi 91, 105 Reykjavík, merkt UMSÓKN – SVIÐSHÖFUNDANÁM. Mappan skal póstlögð eigi síðar en auglýstur umsóknarfrestur, en umsækjendur eru hvattir til að póstleggja fyrr þar sem tafir geta verið póstsendingum. 

1. Umsækjendur skila inn möppu á rafrænu formi. Mappan þarf að vera á .pdf formi og á allri möppunni að vera skilað sem einu .pdf skjali. Hljóðverk, vídeóverk og sambærileg skjöl skulu send sem virkir hlekkir/slóð inni í möppunni. Rafrænni möppu er skilað inn í rafrænu umsóknina undir ,,Ferilmappa”.
    

Mikilvægt er að umsækjendur fylgist vel með framgangi umsóknar sinnar í gegnum samskiptagátt Uglu. Í gegnum Ugluna fá umsækjendur skilaboð ef einhver fylgiskjöl vantar. Umsóknin er fyrst fullkláruð þegar möppu hefur verið skilað og öll fylgiskjöl í lagi. Með hliðsjón af umsókn og möppu verður völdum umsækjendum boðið að þreyta inntökupróf. 

Þið finnið rafrænu umsóknina HÉR.  

Inntökuferlið er í tveimur þrepum:   

1. þrep: Umsækjendur senda inn umsókn með tilætluðum umsóknargögnum.
Þeir sem senda fullnægjandi umsókn með fullnægjandi gögnum og standast inntökuskilyrði Listaháskóla Íslands fá boðun í inntökupróf og komast þá í gegnum fyrsta þrep. Umsóknum verður svarað í síðasta lagi 22. apríl 2027.

2. þrep: Fer fram dagana 29. apríl til 1. maí og skiptist í fjóra hluta:

Dagur 1: Fyrsti og annar hluti. 

Fyrsti hluti samanstendur af skriflegu verkefni þar sem lögð er áhersla á greiningarhæfni og skapandi, skriflega úrvinnslu umsækjenda. Umsækjendur horfa á um 1 klukkustundar langt brot úr sviðsverki eða upptöku af sviðsverki og fá í kjölfarið 2 klukkustundir til þess að skrifa texta sem þeir skila til inntökunefndar. Form textans er frjálst.   

Annar hluti samanstendur af hópverkefni. Umsækjendur fá send gögn fyrir prufuna og er síðan skipt í hópa og fá 2 klukkustundir til þess að skapa sviðsverk í sameiningu. Verkið skal ekki vera lengra en 10 mínútur.  

Dagur 2 eða 3: Þriðji og fjórði hluti. 

Þriðji hluti felur í sér flutning á stuttu, frumsömdu atriði eða gjörningi sem umsækjendur flytja fyrir inntökunefnd. Atriðið skal ekki vera lengra en 5 mínútur.   

Fjórði hluti felur í sér einstaklingsviðtal. Viðtalið hefur þann tilgang að kanna almennan áhuga umsækjanda á tilvonandi námi, afstöðu þeirra, sýn og viðhorf til sviðslista. Spurt er um bakgrunn umsækjenda, aðstæður, heilsu, áhugasvið, ástríðu og væntingar til sviðslista almennt sem og námsins. Einnig er spurt um hugmyndir að baki ferilmöppu umsækjanda og rætt um upplifun og framlag umsækjandans í inntökuferlinu. 

Að loknum prufunum, í síðasta lagi 10. maí 2027 verður öllum umsækjendum sent skriflegt svar. 

Þeir umsækjendur sem fá boð um skólavist þurfa að staðfesta skólavist sína með því að greiða skráningargjald eigi síður en tveimur vikum eftir að niðurstöður eru birtar. Gjaldið er óafturkræft. 

Í inntökunefnd sitja að jafnaði fagstjóri sviðshöfundabrautar, sem er formaður nefndarinnar, kennari við brautina eða deildarforseti, og einn starfandi sviðslistamaður úr faginu. Jafnframt situr fulltrúi nemenda inntökurnar sem áheyrnarfulltrúi en hefur ekki atkvæðisrétt. 

Inntökunefndin velur nemendur úr hópi umsækjenda sem talið er að hafi forsendur til að stunda nám á sviðshöfundabraut og sem standast þau skilyrði sem tilgreind eru í reglum Listaháskólans. Inntökunefndin hefur að leiðarljósi að viðkomandi geti sem best nýtt sér það nám sem í boði er. Ekki skal túlka mat nefndarinnar á þann hátt að í því felist dómur um listræna hæfileika umsækjenda almennt. Störf nefndarinnar eru trúnaðarmál og birtir hún ekki umsagnir um einstaka umsóknir. Úrskurður hennar er endanlegur og verður ekki vísað til endurskoðunar annars staðar innan skólans.  

Þættir sem inntökunefnd metur eru meðal annars:  

• Hugmyndaauðgi: Hæfni umsækjanda til að fylgja innsæi sínu og finna hugmyndum sínum farveg með skapandi hætti.  

• Áræðni: Horft er til forvitni,  frumkvæðis og sjálfstæðra vinnubragða umsækjanda í listrænni vinnu, túlkun, úrvinnslu hugmynda og framsetningu.   

• Formskynjun: Meðvitund um möguleika og mörk þeirra tjáningarforma sem
  umsækjandi velur sér.  

• Uppbygging: Hæfni umsækjanda til samsetningar skriflegra verkefna sem og verklegra verkefna. Horft er m.a. til flæðis, samhengis og dramatúrgíu, beitingu stílbragða og  uppbrota við merkingarsköpun.   

• Rýmisskynjun: Hæfni umsækjanda til að skynja og vinna með samhengi líkama, rýmis, tíma og aðstæðna.  

• Vinnusiðferði: Viðhorf umsækjanda til vinnu og náms og hæfni umsækjanda til sjálfstæðrar vinnu og samvinnu. Horft er til sjálfstæðis og frumkvæðis umsækjanda. Einnig þess hvernig viðkomandi tekur gagnrýni og hugmyndum annarra og nýtir í listrænni vinnu.  

• Samskiptahæfni og gagnrýnin hugsun: Hæfni umsækjanda til að tjá sig um eigin vinnu, þau verkefni sem viðkomandi velur sér og sem lögð eru fyrir. Sem og hæfni umsækjanda til þess að tjá sig á gagnrýnin hátt um samtímalistir, sér í lagi sviðslistir.   

Almenn inntökuskilyrði eru að hafa lokið stúdentsprófi, lokaprófi frá framhaldsskóla á þriðja hæfniþrepi, sambærilegu prófi frá erlendum framhaldsskóla eða að lágmarki 60 ECTS einingum frá viðurkenndum háskóla. Umsóknum skal fylgja staðfest afrit af prófskírteinum og staðfest afrit af námsferilsyfirliti.  

Heimilt er að veita inngöngu í skólann þeim umsækjendum sem búa yfir þekkingu og reynslu sem telst fullnægjandi undirbúningur til bakkalárnáms við skólann. Sjá nánar „Undanþágur frá almennum inntökuskilyrðum“

Inntökunefndir meta umsóknir á grundvelli innsendra gagna auk viðtala og/eða inntökuprófa á þeim sviðum sem við á. Deildarforseti skipar inntökunefnd fyrir hverja námsleið í samráði við fagstjóra og vinna inntökunefndir eftir verklagsreglum sem kynntar eru umsækjendum.   

Heimilt er að veita inngöngu í skólann þeim umsækjendum sem búa yfir þekkingu og reynslu sem telst fullnægjandi undirbúningur til bakkalárnáms við skólann.   

Umsækjendur sem ekki uppfylla almenn inntökuskilyrði geta sótt um undanþágu hafi þeir lokið t.d. fjölmörgum einingum á framhaldsskólastigi, lokið öðrum lokaprófum svo sem á 4. hæfniþrepi eða hafa annan undirbúning sem getur undirbúið viðkomandi undir nám á háskólastigi á viðkomandi námsleið. Umsóknir um undanþágu frá almennum inntökuskilyrðum eru metnar af fagaðilum innan viðkomandi deildar. Niðurstaða mats á undanþáguumsóknum er endanleg. Við mat á umsóknum er horft til samverkandi þátta með tilliti til einkunna í námi á framhaldsskólastigi, menntunar í listgreinum, frekari menntunar, starfsreynslu og þátttöku í félagsstörfum. Hvert tilfelli er skoðað sérstaklega og getur samspil þessara þátta haft áhrif á niðurstöðu. Umsækjendur eru hvattir til að gera grein fyrir öllu því sem þeir telja geta orðið umsókn sinni um undanþágu frá almennum inntökuskilyrðum til framdráttar.   

Inntökunefndir meta umsóknir á grundvelli innsendra gagna auk viðtala og/eða inntökuprófa á þeim sviðum sem við á. Deildarforseti skipar inntökunefnd fyrir hverja námsleið í samráði við fagstjóra og vinna inntökunefndir eftir verklagsreglum sem kynntar eru umsækjendum.