Leikaranám BA

Til að umsókn sé fullgild þarf að borga umsóknargjald og eftirfarandi gögn þurfa að berast Listaháskólanum:   

1. Staðfest afrit af prófskírteinum. (PDF) (Skylda) – athugið að ljósrit gildir ekki.
   a) Skannið frumrit af prófskírteinum og hengið við rafrænu umsóknina, eða
   b) Fáið staðfest afrit af prófskírteinum með stimpli frá viðkomandi skóla, skannið og hengið við rafrænu umsóknina. 
2. Ljósmynd af umsækjanda. (jpg. eða png.) (Skylda) Henni er bætt við undir „Önnur skjöl“.
3. Kynningarbréf. (PDF) (Skylda) Því er bætt við undir „Kynningarbréf”.  

Umsækjandi skal tilgreina ástæður umsóknar, reynslu, markmið, framtíðarsýn og fleira í stuttum texta, hámark 1 blaðsíða. Umsækjendur skulu taka afstöðu til eftirfarandi spurninga í kynningarbréfi:  

                        a/ Hvað er það við sviðslistir sem vekur áhuga þinn? 

                        b/ Hvers vegna viltu verða leikari? 

                        c/ Hvað er það við leikaranám við LHÍ sem vekur áhuga þinn? 

Mikilvægt er að umsækjendur fylgist vel með framgangi umsóknar sinnar í gegnum samskiptagátt Uglu. Í gegnum Ugluna fá umsækjendur skilaboð ef einhver fylgiskjöl vantar. Umsóknin er fyrst fullkláruð þegar öll fylgiskjöl eru í lagi.  

Þið finnið rafrænu umsóknina HÉR.  

Þeim umsækjendum sem uppfylla öll inntökuskilyrði er boðið í 1. þrep inntökuprófanna.  

• Umsækjendur mæta í eigin persónu og flytja 2 eintöl fyrir framan inntökunefnd (sjá upplýsingar um eintöl hér fyrir neðan). 

• Inntökuprófin fara fram í húsnæði Sviðslistadeildar að Laugarnesvegi 91, 105 Reykjavík, dagana 14. til 18. desember 2026. 

• Niðurstöður úr 1. þrepi verða sendar til umsækjenda með tölvupósti í desember 2026.  

• Umsækjendur sem ekki komast í eigin persónu vegna búsetu eða sérstakra aðstæðna geta sent inn myndbandsupptökur af eintölunum. Vinsamlegast hafið samband við deildarfulltrúa Sviðslistadeildar (ellenhk@lhi.is) til að fá frekari upplýsingar. 

Þú velur þér 2 eintöl til að flytja:

1. Annað eintalið skal vera í óbundu máli. Hægt er að velja úr eintölunum hér fyrir neðan eða flytja eintal að eigin vali.
2. Hitt eintalið skal vera í bundnu máli úr listanum hér fyrir neðan. (ATH: Bundið mál er texti í ljóð- eða formbundinni byggingu þar sem  taktur, hrynjandi og uppsetning skipta máli. )

ATH – Listi af eintölum verður birtur þegar opnað verður fyrir umsóknir, 5. október 2026.

Leiðbeiningar fyrir flutning eintala fyrir framan inntökunefnd:     

• Hver umsækjandi flytur 2 eintöl.
• Eitt eintal (2-3 mín) í óbundnu máli,  úr listanum yfir eintöl hér fyrir ofan eða eintal að eigin vali.
• Eitt eintal (2-3 mín) í bundnu máli. Eintal í bundnu máli skal vera úr listanum yfir eintöl hér fyrir ofan.
• Inntökunefnd fær að sjá bæði eintöl og verða því umsækjendur stöðvaðir ef flutningur hvors eintals um sig fer yfir 3 mínútur í flutningi.
• Flutningur þarf að fara fram á íslensku.
• Það skiptir ekki máli fyrir hvaða kyn hlutverkið var upphaflega skrifað. Ef umsækjendur kjósa mega þeir breyta persónugerð orða. Dæmi: ,,ég er glöð – ég er glaður – ég er glatt”. Að öðru leyti er ekki leyfilegt að breyta textanum.
• Umsækjendur fá til umráða 1 stól og 1 borð. Aðra leikmuni er ekki leyfilegt að nota í flutningi fyrir framan inntökunefnd.

      Umsækjendur sem komast áfram í 2. þrep fá nánari upplýsingar sendar með tölvupósti. 

• 2. þrepið fer fram 2. til 5. janúar 2027 (nánari dagsetning tilkynnt síðar).  
•      2. þrep samanstendur af radd- og líkamsupphitun, hópverkefni og flutningi á eintali (sömu eintöl og voru flutt í 1. þrepi). Inntökunefnd fær að sjá brot úr báðum eintölum og leikstýrir öðru þeirra.  

• Niðurstöður úr 2. þrepi verða sendar til umsækjenda með tölvupósti eigi síðar en 7. janúar 2027.   

     Umsækjendur sem komast áfram í 3. þrep fá nánari upplýsingar sendar með tölvupósti.   

• 3. þrepið fer fram dagana 11. til 17. janúar 2027.
• Þeir umsækjendur sem boðið er að taka þátt í þriðja þrepi taka þátt í vinnustofu sem fer fram á 6 daga tímabili.  
• 3. þrep samanstendur af radd- og líkamsvinnu, textavinnu og verkefnavinnu með áherslu á frumsköpun og senuvinnu.  
• Niðurstöður úr 3. þrepi verða sendar til umsækjenda með tölvupósti eigi síðar en 27. janúar 2027.  

• Þeir umsækjendur sem fá boð um skólavist þurfa að staðfesta skólavist sína með því að greiða skráningargjald eigi síður en tveimur vikum eftir að niðurstöður eru birtar. Gjaldið er óafturkræft. 

Deildarforseti skipar þriggja manna inntökunefnd í samráði við fagstjóra. Í nefndinni sitja að jafnaði fagstjóri og kennari við brautina og/eða deildarforseti. Jafnframt sitja í nefndinni einn starfandi sviðslistamaður/leikari.    

Í 2. og 3. þrepi inntökuprófanna situr einnig áheyrnarfulltrúi nemenda af leikarabraut en hann hefur ekki atkvæðarétt í nefndinni.   

Inntökunefndin velur nemendur úr hópi umsækjenda sem talið er að hafi forsendur til að  stunda leikaranám við Sviðslistadeild LHÍ og sem standast þau skilyrði sem tilgreind eru í reglum Listaháskólans. Inntökunefnd hefur að leiðarljósi að viðkomandi geti sem best nýtt sér það nám sem í boði er.   

Ekki skal túlka mat nefndarinnar á þann hátt að í því felist dómur um listræna hæfileika  umsækjenda almennt. Störf nefndarinnar eru trúnaðarmál og birtir hún ekki umsagnir um  einstaka umsóknir. Úrskurður hennar er endanlegur og verður ekki vísað til endurskoðunar annars staðar innan skólans.    

Þættir sem inntökunefnd metur í 1. þrepi eru:    

• Samsömunarhæfni: M.a. er horft til persónusköpunar, túlkunar, innlifunar og samsömunar.
• Textavinna: Hæfni og möguleikar umsækjanda til að nálgast texta og vinna úr honum á skapandi hátt.
• Hugmyndaauðgi: Hæfni til að finna hugmyndum sínum farveg með skapandi hætti.  

Þættir sem inntökunefnd metur í 2. og 3. þrepi eru:    

• Samsömunarhæfni: M.a. er horft til persónusköpunar, túlkunar, innlifunar og samsömunar. 
• Líkamsbeiting: Hæfni og möguleikar umsækjanda til líkamlegrar vinnu í rými og tíma. M.a. er horft til mýktar, úthalds, hrynjanda og styrks.  
• Rýmisskynjun: Hæfni og möguleikar umsækjanda til að skynja líkama sinn í samhengi við það rými og þær aðstæður sem hann er í hverju sinni.  
• Raddbeiting: Hæfni og möguleikar umsækjanda til að vinna með mýkt, úthald, hrynjandi og styrk raddarinnar.  
• Textavinna: Hæfni og möguleikar umsækjanda til að nálgast texta og vinna úr honum á skapandi hátt.  
• Samvinna: Hæfni umsækjanda til samvinnu. Hvernig viðkomandi tekur á móti gagnrýni og hugmyndum annarra. Horft er til sjálfstæðis, frumkvæðis og hlustunar í vinnu.
• Hugmyndaauðgi: Hæfni til að finna hugmyndum sínum farveg með skapandi hætti. M.a. er horft til forvitni og áræðni í hugmyndum og framsetningu. 
• Samskiptahæfni og gagnrýnin hugsun: Hæfni umsækjanda til að tjá sig um þau verkefni sem hann velur sér og fyrir hann eru lögð.  
• Vinnusiðferði: Viðhorf umsækjanda til vinnu og náms.  

Athugið að prufurnar geta verið mjög krefjandi bæði andlega og líkamlega.  

Almenn inntökuskilyrði eru að hafa lokið stúdentsprófi, lokaprófi frá framhaldsskóla á þriðja hæfniþrepi, sambærilegu prófi frá erlendum framhaldsskóla eða að lágmarki 60 ECTS einingum frá viðurkenndum háskóla. Umsóknum skal fylgja staðfest afrit af prófskírteinum og staðfest afrit af námsferilsyfirliti.  

Heimilt er að veita inngöngu í skólann þeim umsækjendum sem búa yfir þekkingu og reynslu sem telst fullnægjandi undirbúningur til bakkalárnáms við skólann. Sjá nánar „Undanþágur frá almennum inntökuskilyrðum“

Inntökunefndir meta umsóknir á grundvelli innsendra gagna auk viðtala og/eða inntökuprófa á þeim sviðum sem við á. Deildarforseti skipar inntökunefnd fyrir hverja námsleið í samráði við fagstjóra og vinna inntökunefndir eftir verklagsreglum sem kynntar eru umsækjendum.   

Heimilt er að veita inngöngu í skólann þeim umsækjendum sem búa yfir þekkingu og reynslu sem telst fullnægjandi undirbúningur til bakkalárnáms við skólann.   

Umsækjendur sem ekki uppfylla almenn inntökuskilyrði geta sótt um undanþágu hafi þeir lokið t.d. fjölmörgum einingum á framhaldsskólastigi, lokið öðrum lokaprófum svo sem á 4. hæfniþrepi eða hafa annan undirbúning sem getur undirbúið viðkomandi undir nám á háskólastigi á viðkomandi námsleið.  

Umsóknir um undanþágu frá almennum inntökuskilyrðum eru metnar af fagaðilum innan viðkomandi deildar. Niðurstaða mats á undanþáguumsóknum er endanleg.  

Við mat á umsóknum er horft til samverkandi þátta með tilliti til einkunna í námi á framhaldsskólastigi, menntunar í listgreinum, frekari menntunar, starfsreynslu og þátttöku í félagsstörfum. Hvert tilfelli er skoðað sérstaklega og getur samspil þessara þátta haft áhrif á niðurstöðu. Umsækjendur eru hvattir til að gera grein fyrir öllu því sem þeir telja geta orðið umsókn sinni um undanþágu frá almennum inntökuskilyrðum til framdráttar.   

Inntökunefndir meta umsóknir á grundvelli innsendra gagna auk viðtala og/eða inntökuprófa á þeim sviðum sem við á. Deildarforseti skipar inntökunefnd fyrir hverja námsleið í samráði við fagstjóra og vinna inntökunefndir eftir verklagsreglum sem kynntar eru umsækjendum.