Hildur Sumarliðadóttir

Upp, Upp og Snú

Valdeflandi vinnusmiðja og námsvefur fyrir framhaldsskóla

Þetta lokaverkefni fjallar um hvernig skapandi vinnusmiðja og fræðsla geta valdeflt ungmenni til að verða meðvitaðir og ábyrgir neytendur í heimi þar sem hraðtíska, skaðleg efni í fatnaði og mannréttindabrot eru daglegt brauð.

Í verkefninu er fjallað um áhrif textíliðnaðarins á heilsu, umhverfi og samfélag, með sérstakri áherslu á eiturefni í fatnaði, samfélagslega ábyrgð og sjálfbærni. Byggt er á fræðilegum grunni um menntun til sjálfbærni, umbreytandi nám og listrænan aktívisma sem kennsluaðferð, þar sem listsköpun er notuð til að efla gagnrýna hugsun og vitundarvakningu. Verkefnið felur í sér eigindlega rannsókn á vinnusmiðjunni Upp Upp og Snú, þar sem ungmenni fengu tækifæri til að skapa úr notuðum textíl og ígrunda áhrif neyslu sinnar. Aðferðafræðin byggði á þátttöku, viðtölum og þemagreiningu á upplifun þátttakenda.

Niðurstöður sýna að slík fræðsla og skapandi nálgun getur aukið meðvitund ungmenna um sjálfbærni, eiturefni í fatnaði og félagslega ábyrgð, auk þess að draga úr vanmáttarkennd og loftslagskvíða með valdeflandi verkfærum. Afurð verkefnisins er námsvefur sem inniheldur verkefni sem styðja við kennslu í sjálfbærni og skapandi endurnýtingu. Ritgerðin undirstrikar mikilvægi þess að samþætta gagnrýna fræðslu og listir í skólastarfi til að efla virka þátttöku ungmenna í samfélagi framtíðarinnar.

Hlekkur á námsvef hér

Leiðbeinandi: Hanna Margrét Einarsdóttir
30 ECTS MA listkennslufræði
2025