Atli Ingólfsson

Atli Ingólfsson útskrifaðist frá Tónlistarskólanum í Reykjavík árið 1984 þar sem hann stundaði tónsmíðanám hjá Þorkeli Sigurbjörnssyni og Atla Heimi Sveinssyni. Hann stundaði tónsmíðanám við Konservatoríuna í Mílanó hjá Davade Anzaghi á árunum 1985 til 1988 og sótti einkatíma í tónsmíðum hjá Gérard Grisey í París á árunum 1988 - 1990. Hann sótti einnig sumarnámskeið í Siena árið 1988 og við IRCAM í París árið 1992. Atli var um árabil búsettur á Bologna á Ítalíu þar sem hann starfaði nánast eingöngu við tónsmíðar. Árið 2006 flutti Atli aftur til Íslands og hefur síðan sinnt kennslu meðfram tónsmíðum. 

Verk Atla skipta tugum og eru af öllu tagi. Þau hafa verið pöntuð og flutt víða um Evrópu en meðal flytjenda má nefna Ensemble Intercontemporain, Ensemble l’Itinéraire, Les percussions de Strasbourg, Arditti-kvartettinn, Avanti Chamber Orchestra, Caput og Sinfóníuhljómsveit Íslands.

Casa Ricordi útgáfan í Mílanó hefur gefið nokkur verka Atla út á nótum og fjöldi þeirra hefur komið út á geisladiskum á Íslandi, Frakklandi, Ítalíu og Þýskalandi, en hjá BIS útgáfunni í Stokkhólmi kom út diskur helgaður verkum hans árið 2005.

Atli hefur ritað fjölda greina um tónlist og menningu og hafa þær meðal annars birst í Fréttablaðinu, Skírni og Þráðum (tímarit tónlistardeildar LHÍ) en auk þess gefið út Hljómamál, kennslubók í hljómfræði.
Nánar má lesa um starf Atla á ensku á heimasíðunni www.atli-ingolfsson.com

Atli er prófessor og fagstjóri meistaranáms í tónsmíðum við Tónlistardeild LHÍ.