Viibra gerir víðreist

Flautuseptettinn viibra fylgdi eftir plötu sinni, viibra, sem kom út árið 2024, með tónleikahaldi á árinu. Í maí kom viibra fram á Classical: NEXT sem fram fór í Berlín í ár og í september kom hópurinn fram á tónlistarhátíðinni Hidden Notes í Stroud á Englandi, auk tónleikahalds í London og Reykjavík.

Á tónleikunum flutti hópurinn verk af plötunni eftir meðlimi og samstarfsaðila septettsins, þar á meðal Berglindi Maríu Tómasdóttur, prófessor við tónlistardeild og meðlim viibru og Bergrúnu Snæbjörnsdóttur, dósent við tónlistardeild. Viibra er flautuseptett sem kannar margslunginn hljóðheim flautunnar, stofnaður haustið 2016 að tilstuðlan Bjarkar í tengslum við gerð plötu hennar Utopia.

Á árunum 2018 til 2023 ferðaðist viibra með Björk víða um heim með hina margrómuðu sýningu Cornucopia. Meðlimir viibru eru virkir í íslensku tónlistarlífi sem flytjendur, tónskáld og kennarar. Mynd frá tónleikum viibru á Hidden Notes.

Ljósmyndari: James Styler