Þingmenn Viðreisnar heimsóttu LHÍ
Þann 13.febrúar heimsóttu þingmenn Viðreisnar, Pawel Bartoszek og Grímur Grímsson, Listaháskóla Íslands. Með þeim var Pétur Björgvin Sveinsson, aðstoðarmaður þingsflokks Viðreisnar. Kristín Eysteinsdóttir, rektor, og Haukur Björnsson, framkvæmdastjóri LHÍ, tóku á móti þeim og kynntu fyrir þeim starfsemi skólans. Rætt var um mikilvægi skapandi greina í verðmætasköpun landsins og hlutverk skólans í stóru samhengi.
Í kynningu skólans var aðstaða og húsakostur LHÍ tekinn fyrir en húsnæðismál skólans hafa lengi verið í brennidepli vegna bágrar stöðu mála. Mögulegar lausnir voru lagðar fram og kom fram sterkur vilji til að styðja skólann í vegferð hans að viðeigandi framtíðarlausn.
Við þökkum þingmönnum Viðreisnar kærlega fyrir komuna og bjóðum alla flokka velkomna í heimsókn.
