Talk series | Fabrice Hybert // Líkami okkar er landið okkar

Gestafyrirlestur í fyrirlestraröðinni Umræðuþræðir í Listasafni Reykjavíkur – Hafnarhúsi fimmtudaginn 3. október kl. 20.

Fyrsti gestur Umræðuþráða veturinn 2024–2025 er myndlistarmaðurinn Fabrice Hybert frá Frakklandi, sem gengur undir listamannanafninu Fabrice Hyber. Það er einstaklega ánægjulegt að geta tekið á móti honum hér á landi og fá tækifæri til að kynna hann og einstök verk hans fyrir gestum safnsins.

UMRÆÐUEFNIÐ

Um efni fyrirlestrarins segir Fabrice Hyber:

Efnislegi hluti verksins skiptir ekki öllu máli, heldur geta verksins til að hafa áhrif á hegðun okkar. Ég hef frá byrjun reynt að leita að uppruna og kenningu um eigin list: öll smáatriði skipta máli!

Hver hreyfing virkjar hugsun okkar og ég var viss um að ég myndi geta skilið líf mitt út frá dalnum sem ég ólst upp í. Ég ákvað því fyrir nokkrum árum að deila öllum þeim tilfinningum sem ég upplifi í dalnum með almenningi. Þetta er staður þar sem ég hef lært og gert tilraunir, líkt og í málverkinu, en málverkin mín eru eins og skólatöflur. Ég teikna allar spurningar mínar og öll möguleg svör.

Líkt og rannsakandi þá útlista ég og skýri með dæmum. Þegar ég er að vinna hjá Pasteur stofnunni í París, geri ég rannsóknir í gegnum myndir sem byggja á hugtökum. Ég elska að gera tengingar á milli ólíkra vistgerða.

Í fyrirlestri mínum í Umræðuþráðum ætla ég að sýna ykkur nokkrar myndir og tala um vinnuaðferðir mínar.

GESTURINN

Fabrice Hyber er fæddur árið 1961 í Luçon í Vendée héraðinu í Frakklandi. Hann lagði stund á stærðfræði og eðlisfræði áður en hann hóf nám í myndlist við Fagurlistaskólann í Nantes, þaðan sem hann útskrifaðist árið 1985. Fabrice Hyber lítur á höfundarverk sitt sem eitt risastórt rísóm, þar sem hvert verk er hluti af stóru heildarkerfi. Hann notar teikningar, málverk, innsetningar og myndbönd í verkum sem kanna samband manneskju og umheims í óbeisluðu samtali milli lista og vísinda og hefur meðal annars átt í samstarfi við rannsóknarstofnanir og vísindamenn á sviði líftækni, veirufræði og örverufræði. Hann hefur á undanförnum árum varið hluta af tíma sínum í að rannsaka vistkerfi með því að planta trjám á jörð foreldra sinna í dalnum þar sem hann ólst upp. Í upphafi ferilsins beindist áhugi hans að einkafyrirtækjum og voru mörg verka hans unnin í samstarfi við slík fyrirtæki, en til að halda sjálfstæði sínu í framleiðslu og dreifingu stofnaði hann eigið fyrirtæki undir nafninu Ótakmörkuð ábyrgð. Fyrirtækið framleiðir meðal annars ónothæfa hluti eftir Hyber, svokallaða POF hluti en POF er skammstöfun fyrir prototype d‘object en fonctionnement eða frumgerðir virkra hluta.

Fabrice Hyber hlaut Gullna ljónið í Feneyjum árið 1997 og hefur átt sæti í Frönsku akademíunnar síðan árið 2018. Hann var tilnefndur skógarsendiherra Skógræktarstofnunnar Frakklands árið 2021 og hefur gengt formennsku í stjórn Myndlistarmiðstöðvar Frakklands (CNAP) síðan 2022.

Umræðuþræðir er samstarfsverkefni Myndlistarmiðstöðvar, Listasafns Reykjavíkur og Listaháskóla Íslands