Sneiðmynd – HYSTERIA // Ragna S. Bjarnadóttir

Í ár eru tíu ár síðan Ragna lauk BA námi frá Listaháskóla Íslands og mun hún fara yfir þann tíma, segja frá mastersverkefninu sínu, HYSTERIA, sem var sýnt á tískuvikunni í Kaupmannahöfn sumarið 2017 og valið í hönnunarsamkeppni í Milano og hönnunarviku í London, áráttunni fyrir bleika litnum og því að reyna að finna sinn stað í tískubransa sem er allt annað en skapandi og sem neitar að horfast í augu við eigin sóun og ofnýtingu auðlinda og mannafls.

Ragna Bjarnadóttir útskrifaðist með mastersgráðu í fatahönnun frá Royal Danish Academy árið 2017 og starfaði sem fatahönnuður hjá 2NDDAY, Part Two, Pura UTZ, Stine Goya og Designers Remix ásamt því að taka að sér fataframleiðsluverkefni og sinna eigin listsköpun í textíl. Árið 2022 fluttist hún heim til Íslands og starfaði sem framleiðslustjóri hjá Hildi Yeoman og stundakennari við Listaháskólann þar til hún tók við sem fagstjóri fatahönnunardeildarinnar haustið 2023.