Tónlistarnæring með Voces Thules

Sönghópurinn Voces Thules var stofnaður 1991 og hefur náð að skipa sér sess sem einn helsti tónlistarhópur á Íslandi á sviði miðaldatónlistar. Hópurinn hefur verið leiðandi afl í rannsóknum og flutningi á íslenskri tónlistarhefð miðalda. Viðamesta verkefni hópsins er heildarflutningur, hljóðritun og útgáfa á Þorlákstíðum, einu merkasta af íslenskum tónlistarhandritum, sem voru gefnar út í apríl 2006 og hlutu Íslensku tónlistarverðlaunin sem plata ársins í sígildri og samtímatónlist. Voces Thules hefur komið fram á alþjóðlegum tónlistarhátíðum víða í Evrópu og Japan. Hópurinn var tilnefndur til Tónlistarverðlauna Norðurlandaráðs sem flytjendur ársins 2008. Voces Thules hópurinn hefur undanfarin 15 ár miðlað þekkingu sinni og reynslu á vettvangi Listaháskóla Íslands þar sem árlegt námskeið er haldið í miðaldatónlist.