Tónlistardagur Halldórs Hansen

Listaháskóli Íslands veitir á hverju vori styrk úr Styrktarsjóði Halldórs Hansen til framúrskarandi tónlistarnema við skólann. Að þessu sinni hlaut BryndísÁsta Magnúsdóttir söngkona verðlaunin sem voru veitt við hátíðlega athöfn í Skriðu, sal LHÍ í Stakkahlíð. Við þetta tækifæri  ávarpaði Kristín Eysteinsdóttir, rektor, gesti og sagði frá  þeim einstaka manni, Halldóri Hansen sem gaf eigur sínar til Listaháskóla Íslands meðýmsum skilyrðum, þar á meðal að skólinn veldi framúrskarandi útskriftarnemanda á hverju ári á sviði klassísks tónlistarflutnings (söngs eða hljóðfæraleiks) og sá hinn sami myndi hljóta verðlaun með peningagjöf. 

„Halldór var merkur maður, hann lauk embættisprófi í læknisfræði frá Háskóla Íslands og hélt þá utan til New York í kandidatsnám þar sem hann sérmenntaði sig í barnalækningum og barnageðlækningum. Hann fluttist til Reykjavíkur þar sem hann starfaði á á Heilsuverndarstöð Reykjavíkur og tók við yfirlæknisstöðu ungbarnaeftirlitsins þar1961, en þeirri stöðu gegndi hann út sínstarfsævi. 

Tónlist var stóra ástríðan í lífi Halldórs en hann hafði ætíð mikinn áhuga á tónlist, einkum sönglist, og átti gríðarlega stórt hljómplötusafn með klassískri tónlist. Frá barnæsku var það ástríða hans að sækja tónleika og óperusýningar, á Íslandi og um víða veröld.  

Söngvarar sem sungu frá hjartanu voru ávallt í hávegum hafðir hjá Halldóri og nokkrir þeirra allra fremstu urðu góðir vinir hans. Hann skrifaði mikið um söng og tónlistarmál jafnt í dagblöð og tímarit. Hann kenndi við Söngskólann í Reykjavík um árabil og var listrænn ráðgjafi Tónlistarfélagsins í Reykjavík og Íslensku óperunnar.“ 

Að loknu ávarpi rektors steig Ólafur Freyr Birkisson, styrkþegi sjóðsins árið 2023 á svið ásamt meðleikara sínum, Matthildi Önnu Gísladóttur.  

Eftir fallegan söng hélt Magnús Lyngdal erindið Upprunaskólinn í klassískri tónlist. Einnig minntist Pétur Jónsson, deildarforseti Tónlistardeildar, Halldórs en hann minntist þess að þegar hann sjálfur var ungur og nýkomin úr námi að þá uppgötvaði hann að það voru einstaklingar umhverfis hann sem sköpuðu net til stuðnings, hvattningar og öryggis. Í þessu neti taldi hann upp nokkur nöfn og þar að meðal nafn Halldórs Hansen. Hann minntist Halldórs með fallegum orðum, „það sem maður man mest eftir er hvað það geislaði af honum mikilli hlýju, nærvera hans og hvatning var í senn góð og nærandi.“ 

„Bryndís Ásta er einstaklega efnileg söngkona með mikla útgeislun og góða tengingu við tónlistina. Það er okkur sönn ánægja að veita henni styrk úr Styrktarsjóði Halldórs Hansen og styðja þannig við framhald hennar á glæsilegri tónlistarvegferð,“ sagði Hanna Dóra Sturludóttir fagstjóri söngs hjá LHÍ. Styrkurinn úr Styrktarsjóði Halldórs Hansen er mikilvæg viðurkenning á hæfileikum og elju ungs listamanns og mikilvægt framlag til áframhaldandi náms og þróunar í klassískum söng. 

Bryndís Ásta hóf klassískt söngnám sitt fimmtán ára gömul undir handleiðslu Guðrúnar Jóhönnu Jónsdóttur, Guðrúnar Dalíu Salómonsdóttur og Þóru Björnsdóttur í Tónlistarskóla Garðabæjar og lauk þaðan framhaldsprófi. Hún hóf nám við Listaháskóla Íslands haustið 2022 en þar hefur hún notið leiðsagnar reyndra kennara á borð við Hönnu Dóru Sturludóttur, Kristinn Sigmundsson, Dísellu Lárusdóttur, Kolbein Ketilsson og Matthildi Önnu Gísladóttur. Að auki dvaldi hún síðastliðið haust í skiptinámi við Konunglega tónlistarháskólann í Stokkhólmi. 

„Í haust snýr Bryndís Ásta aftur til Konunglega tónlistarháskólans í Stokkhólmi þar sem hún mun hefja meistaranám í söng en þess má geta að aðeins tveir einstaklingar af stórum hópi umsækjenda fengu inngöngu að þessu sinni,“ segir Hanna Dóra. „Hún hefur vakið athygli fyrir öfluga sviðsframkomu og fjölbreytt verkefni, þar á meðal hlutverk í óperum eftir Mozart, Strauss og Caccini, frumflutning nýrrar óperu eftir Ea Wiimh og flutning á ljóðaflokkum Schumanns. Hún hefur einnig tekið þátt í tónlistarhátíðum innanlands og utan og stendur sjálf að bæjar- og listahátíðinni Rökkvan í Garðabæ. Nú í sumar syngur hún með Young Nordic Opera Choir á óperuhátíðum í Danmörku, Svíþjóð og á Óperudögum á Íslandi.“ 

Hér fyrir neðan sjást myndir frá athöfninni.