Automatic translation by Google Translate.We cannot guarantee that it is accurate.
Skoða vefinn á Íslensku
FILMA 2025 – Kvikmyndahátíð Listaháskóla Íslands í Bíó Paradís
Kvikmyndahátíðin FILMA fór fram í annað sinn í Bíó Paradís dagana 27.- 29. maí á vegum kvikmyndalistadeild Listaháskóla Íslands.
Að þessu sinni markaði hátíðin söguleg tímamót, þar sem í ár útskrifast fyrsti árgangur deildarinnar og þar með útskrifast nemendur í fyrsta sinn með háskólagráðu í kvikmyndagerð hér á landi.
Það er óhætt að segja að hátíðin hafi tekist með miklum glæsibrag. Uppselt var á allar fjórar sýningarnar, og eftirspurn fór langt fram úr væntingum. Alls voru sýnd kvikmyndaverk eftir 34 nemendur, auk leiklesturs á handritum eftir tvo handritshöfunda.
Fjölbreytt og framandi dagskrá
FILMA er fyrst og fremst uppskeruhátíð kvikmyndalistadeildarinnar, þar sem nemendur kynna afrakstur vetrarins. Hátíðin er unnin í nánu samstarfi við nemendur sem koma að öllum þáttum hennar, allt frá skipulagi og framkvæmd til kynningar og sýninga.
Þessi þriggja daga hátíð innihélt fjórar sýningar fyrir stútfullum sal, þar sem samtals 32 kvikmyndaverk voru sýnd. Fyrsta sýningin var helguð lokaverkefnum 1. árs nema, önnur sýning bauð upp á lokaverk 2. árs nema og sú þriðja var tileinkuð útskriftarverkum útskriftarnema. Í lokin var haldin sérstök hátíðarsýning þar sem útskriftarverkin voru sýnd að nýju.
Verkin voru afar fjölbreytt að efni og nálgun og endurspegluðu samstarf nemenda, sköpunarkraft, hugmyndaauðgi og listræna sýn þeirra.
Hér til hliðar má sjá trailer með brotum úr verkefnum ársins 2025.
FILMA 2025
FILMA 2025 fór fram í Bíó Paradís við frábærar móttökur og fjöldi gesta fór langt fram úr væntingum. Salurinn iðaði af lífi og var stemningin engu lík.
Ljósmyndarinn Sigurjón Ragnar Sigurjónsson var á staðnum og myndaði áhugasama gesti, hamingjusama nemendur og stolt starfsfólk LHÍ. Hér að neðan má sjá brot af gleðinni sem umlukti viðstadda.
Við viljum þakka Bíó Paradís kærlega fyrir dýrmætt samstarf og óskum nemendum og starfsfólki kvikmyndadeildar innilega til hamingju með framúrskarandi árangur og stórkostlega hátíð.
Þangað til næst…
