Skapandi endurnýting í brennidepli á Misbrigði

Verkefnið Misbrigði var haldið í ellefta sinnt með glæsibrag þann 30. október síðastliðinn. Verkefnið er afrakstur nemenda á 2. ári í fatahönnun við skólann og er unnið í samstarfi við Fatasöfnun Rauða kross Íslands. Markmið Misbrigðis er að kanna leiðir til að skapa nýjan fatnað úr ósöluhæfum flíkum með aðferðum hönnunar og vekja athygli á vaxandi vandamáli textílsóunar.

Á tímum þar sem fataframleiðsla fer langt fram úr raunverulegri þörf og mengun af völdum tísku- og textíliðnaðarins hefur náð hættulegum hæðum, er mikilvægt að huga að sjálfbærni og nýtingu. Misbrigði leggur áherslu á skapandi endurnýtingu, þar sem gömul efni og flíkur fá nýtt líf í gegnum hönnun og faglega nálgun nemenda.

Á sýningunni komu fram eftirfarandi nemendur með einstök verk sem öll byggðu á endurnýtingu og frumleika:

• Unnur Ósk Wium Hörpudóttir
• Dagný Rún Gísladóttir
• Agla Arnarsdóttir
• Birta Clara Fernandez Birnudóttir
• Íris Jóna Egilsdóttir
• Ingibjörg Emma Jónsdóttir
• Lovísa Ósk Nielsen
• Þorsteinn Gauja Björnsson
• Kristín Helga Alexandersdóttir
• Arndís Amina Vaz da Silva
• Charlie James Duyker

Verkin sýndu fjölbreyttar nálganir á endurnýtingu textíls og voru vitnisburður um að umhverfisvitund og sköpunargleði geta farið saman. Með Misbrigði er ekki aðeins verið að skapa nýjan fatnað, heldur einnig nýja sýn á framtíð tískunnar.

Fatalínur nemendanna verða til sýnis í Fjöru, Stakkahlíð, dagana 14.–16. nóvember, þar sem almenningur fær tækifæri til að skoða verkin nánar og kynnast hugmyndafræðinni á bak við þau. Sýningin í Fjöru er framlenging á verkefninu og gefur innsýn í hvernig hönnun getur stuðlað að sjálfbærari framtíð.

Myndir: Eygló Gísladóttir