Sigurvegarar Ungra einleikara 2026

Sigurvegarar keppninnar Ungir einleikarar 2026 hafa nú verið valdir, en í gær lauk lokaumferð keppninnar og hlutu fjórir keppendur sigur í ár. Þau munu koma fram sem einleikarar á tónleikum Sinfóníuhljómsveitar Íslands í Eldborg í Hörpu föstudaginn 24. apríl 2026.

Í dómnefnd síðari umferðar keppninnar sátu Sigrún Eðvaldsdóttir, fiðluleikari, Birna Hallgrímsdóttir, píanóleikari, Steinunn Vala Pálsdóttir, flautuleikari, Kristín Einarsdóttir Mäntylä, söngkona, og Tryggvi M. Baldvinsson, listrænn ráðgjafi Sinfóníuhljómsveitar Íslands.

Keppnin Ungir einleikarar er mikilvægur vettvangur fyrir unga tónlistarmenn á Íslandi og veitir sigurvegurum einstakt tækifæri til að stíga á svið með Sinfóníuhljómsveit Íslands og kynna hæfileika sína fyrir breiðum hópi áheyrenda. Í ár sóttu alls 17 keppendur um og var hópur þátttakenda afar fjölbreyttur að vanda.

Ungir einleikarar er samstarfsverkefni Sinfóníuhljómsveitar Íslands og LHÍ en sigurvegarar keppninnar fá tækifæri til þess að flytja einleik í Eldborg, Hörpu ásamt Sinfóníuhljómsveitar Íslands. Hljómsveitarstjóri að þessu sinni er hinn svissneski Baldur Brönnimann sem er aðalstjórnandi og listrænn stjórnandi Konunglegu fílharmóníusveitarinnar og tónlistarháskólans í Galisíu á Spáni.