Metfjöldi nemenda að útskrifast frá Listaháskóla Íslands 

Útskriftarhátíð Listaháskóla Íslands var án efa einn stærsti listviðburður ársins og einn af hápunktum menningarlífsins á höfuðborgarsvæðinu. Á þessu ári voru yfir 70 viðburðir á dagskrá, tæplega 200 nemendur útskrifuðust og áætlað var að yfir 30.000 gestir myndu sækja hátíðina.

„Útskriftarhátíð Listaháskóla Íslands er mikilvægur viðburður sem fagnar og endurspeglar þá sköpunargáfu, grósku, metnað og ástríðu sem nemendur okkar búa yfir og við erum stolt af því að sjá þau stíga fram sem nýjar raddir í íslensku menningarlífi.“ sagði Kristín Eysteinsdóttir, rektor Listaháskóla Íslands. 

Hátíðin hófst formlega þann 24. janúar með sýningum frá sviðlistadeild og viðburðum víðs vegar um borgina og lauk síðustu sýningunni þann 1. júní. 

Fyrstu útskriftarnemar úr Kvikmyndalistadeild  

Kvikmyndahátíðin FILMA, árlegur lokaviðburður kvikmyndalistadeildar, var haldinn í annað sinn. Hátíðin er hápunktur vetrarins þar sem nemendur stíga fram sem sjálfstæðir kvikmyndagerðarmenn og kynna afrakstur námsins. Að þessu sinni markaði hátíðin söguleg tímamót, þar sem í ár er fyrsti árgangurinn að útskrifast með háskólagráðu í kvikmyndagerð hér á landi.

FILMA fór fram í Bíó Paradís dagana 27. – 29. maí, þar sem 32 kvikmynda- og handritsverk voru sýnd. Fyrsta sýningin var helguð lokaverkefnum 1. árs nemenda, önnur sýning sýndi verk 2. árs nemenda, og þriðja sýningin var tileinkuð útskriftarverkum. Hátíðin lauk með sérstökum hátíðarsýningum þar sem útskriftarverk voru sýnd að nýju.

FILMA bauð almenningi, fagfólki og fjölmiðlum einstakt tækifæri til að kynnast nýrri rödd í íslenskri kvikmyndagerð og sjá hvernig nemendur nýta frásagnartækni, form og kvikmyndatækni. Nemendur tóku virkan þátt í öllum þáttum hátíðarinnar, frá hugmyndarvinnu og framkvæmd til kynningar og sýninga, og gerðu FILMU að sannkallaðri uppskeruhátíð.

Útskriftartónleikar Tónlistardeildar 

Útskriftartónleikar Tónlistardeildar eru ómissandi hluti af útskriftarhátíð Listaháskóla Íslands. Í ár útskrifuðust yfir 30 nemendur úr ólíkum námsleiðum, þar á meðal tónsmíðum, hljóðfæraleik, söng, tónlistarkennslu og skapandi tónlistarmiðlun. 

Tónleikarnir endurspegluðu bæði fjölbreytni og dýptina í listsköpun innan deildarinnar. Útskriftartónleikarnir voru fjölbreyttir og fóru fram víðs vegar í borginni, þar á meðal í Salnum í Kópavogi, Hallgrímskirkju, Laugarneskirkju, Norræna húsinu og á fleiri stöðum. Útskriftartónleikarnir eru bæði persónuleg yfirlýsing og fagleg prófraun, þar sem nemendur fá tækifæri til að stíga fram sem sjálfstæðir listamenn undir leiðsögn kennara. 

Útskriftarsýningar BA nemenda í Arkitektúr, Hönnun og Myndlist 

Útskriftarsýning BA nemenda í Arkitektúr, Hönnun og Myndlist var ein af stærri sýningum ársins hjá Listasafni Reykjavíkur. Þetta var tækifæri fyrir fagfólk og áhugafólk að sjá verk framtíðar listamanna og hönnuða. Í ár tóku 74 nemendur þátt í sýningunni „Allt innifalið“. Sýningin veitti innsýn í rannsóknir og vinnuferli nemenda síðustu ára. Fjölbreytt verk nemenda tókust meðal annars á við viðfangsefni eins og hamfarir, samfélagslegt  sinnuleysi og pólitískar yfirlýsingar. Útkoman var glæsileg.  

Meistaranámsútskriftir og Tískusýningar 

Sýning meistaranema í myndlist, „Visible Spectrum“, var haldin í Nýlistasafninu og samanstóð af verkum sem rannsökuðu sjálfsmynd, minni og umbreytingu. Þessi sýning hafði þá sameiginlegu skuldbindingu að kanna viðfangsefnin í gegnum myndlist. 

Tískusýning útskriftarnema fatahönnunardeildar var haldin í Hörpu. Nemendur kynntu verkin sín eftir þriggja ára nám. Lokaverkefni fatahönnunarnema voru einstaklingsverkefni sem fela í sér frjálsa rannsókn, hönnun á fatalínu og útfærslu á fatalínu undir handleiðslu leiðbeinenda. 

Útskriftarverk Sviðslistadeildar 

Í ár útskrifuðust 37 nemendur frá sviðslistadeild, sem stigu fram með fjölbreytt verk á sviði dans, leiklistar og sviðshöfundar. Útskriftarverk voru alls 20 talsins og sýnd á fjölmörgum stöðum víðsvegar um landið, þar á meðal í Listaháskólanum Laugarnesi, Þjóðleikhúsinu, Borgarleikhúsinu, Tunglinu á Austurstræti, Kartöflugeymslunni í Eyrarbakka, Ölveri í Glæsibæ og Leifshúsi í Akureyri. 

MA-nemendur opnuðu útskriftarhátíðina þann 24. janúar með fjölbreyttu úrvali verka, sem endurspeglaði skapandi ferðalag þeirra í gegnum námstímann – tíma sem var helgaður rannsóknum, tilraunastarfsemi og listrænni sköpun. 

Útskriftarverk sviðshöfunda fylgdu á eftir, þar sem 11 nemendur tóku að sér ólík hlutverk sviðshöfunda. Verk þeirra varpa ljósi á fjölbreytta listræna sýn og sjálfstæða nálgun þeirra á sviðslistir, hvort sem þau voru höfundar, leikstjórar, danshöfundar eða flytjendur. 

Nemendur alþjóðlegrar samtímadansbrautar sýndu í vetur frumsamin sólóverk við frábærar undirtektir, og í maí fluttu þau útskriftarverk eftir tvo virta danshöfunda: Höllu Ólafsdóttur, sem setti upp verkið Divine, og Sandrine Cassini, sem frumsamdi Disaster Resilience of the Water sérstaklega fyrir útskriftarhópinn. 

Leikaranemar luku útskriftarhátíð sviðslistadeildar með söngleiknum Leg, eftir Hugleik Dagsson og Flís, sem þau frumsýndu í Kassanum við Þjóðleikhúsið. Þórunn Arna Kristjánsdóttir leikstýrði þessum kraftmikla útskriftarhópi. Allar sýningar voru uppseldar og áhorfendur voru í skýjunum. 

Meistaranámsútskriftir í Arkitektúr og Hönnun 

Sýning meistaranema í arkitektúr var haldin í Safnhúsinu við Hverfisgötu, og bar heitið Visible Spectrum.  Verkefnin sameinuðust í áhugaverða „synergyíu“, þar sem nemendur lögðu fram ólík sjónarhorn, mótuð af fjölbreyttum menningarlegum rótum, miðlum og hugmyndafræðilegum nálgunum. Sýningin endurspeglaði hvernig arkitektúr getur aukið félagslega vitund, eflt félagslegt réttlæti og stuðlað að samfélagslegri umbreytingu. 

Verkin voru sameinuð í því að kanna hvernig arkitektúr getur styrkt sameiginlega rými, bætt aðgengi og stuðlað að samfélagslegri sátt. Nemendur nálguðust verkefni sín sem samstarfsverkefni sem miðuðu að því að við getum öll búið saman í sátt, þar sem arkitektúr var notaður sem verkfæri til að bæta og efla samfélög með listrænni ábyrgð og félagslegri meðvitund. 

Útskriftarsýning meistaranema í hönnun, Meaning Making Machines: Approaches to Perception, Intuition, and Imagined Realities, var haldin í sýningarrýminu Á Milli við Ingólfsstræti. Sýningin varpaði ljósi á og hönnunarhugsun sem beinist að skynjun, nýrri sýn á innsæi, gervigreind og ímynduðum veruleikum. 

Verkin buðu upp á gagnrýna sýn á samtímann og hvöttu gesti til að íhuga tengsl milli tækni, náttúru og sköpunar. Sýningin endurspeglaði fjölbreyttar aðferðir og persónulega nálgun meistaranema við að túlka og móta upplifanir með hönnun sem rannsóknar- og tjáningarform. 

Meistaranámútskrift við Listkennslu 

Listkennsludeild Listaháskóla Íslands stóð fyrir útskriftarviðburði í Hamri í maí. Þar kynntu verðandi listkennarar lokaverkefni sín með fjölbreyttum og skapandi hætti. Nám í listkennslu við LHÍ byggir á samtali milli ólíkra listgreina og kennslufræða og leggur áherslu á leiðtogafærni, samvinnu og gagnrýna hugsun. Nemendur þróa aðferðir sem samþætta listir og kennslu með það að markmiði að hafa áhrif á skólastarf framtíðarinnar. Við útskrift hljóta nemendur kennsluréttindi á öllum skólastigum.