Í sífelldri umbreytingu náttúrunnar ríkir óvissa. Daglegur taktur raskast og í því rofi verða til hverful augnablik, þar sem tíminn virðist standa í stað. Sýningin er niðurstaða tveggja vikna námskeiðs þriðja árs nema í arkitektúr við Listaháskóla Íslands á umhverfi Vestmannaeyja – landi og bæ í stöðugri umbreytingu. Námskeiðið byggir á hugmyndafræði náttúrulæsis, þar sem rannsóknarvinna og formgerð fléttast saman. Náttúran sundrast, veðrast og hreyfist, og í brotunum býr bæði eyðing og sköpun. Þar verða til ný form tengsl og nýr skilningur. Rannsóknin túlkar hið tímabundna ástand umhverfisins; augnablik eru fryst, greind og endurmótuð í formi innsetningar sem leggur áherslu á formræna upplifun svæðisins, innsæi og festu hins hverfula.

Staður og stund:
Slökkvistöðin Gufunesi, 16. janúar kl 17-19