Vel heppnuð afmælishátíð Sviðslistadeildar

Innilegar þakkir til allra sem komu á Afmælishátíð Sviðslistadeildar: Málþing um framtíð sviðslistamenntunar síðastliðinn laugardag. Frábærlega vel heppnaður dagur með frábæru fólki þar sem deildin fagnaði því að í haust eru 25 ár síðan að leikaranám á Íslandi fór upp á háskólastig auk þess sem 20 ár eru frá stofnun sviðshöfundanáms og diplómanáms í samtímadansi við LHÍ.

Bjarni Jónsson, leikskáld og sviðslistamaður, flutti hátíðarávarp og sviðslistahópurinn 16 elskendur stigu á stokk auk þess sem gestum bauðst að taka þátt í málstofum um framtíð sviðslistanáms.

Nokkur orð frá opnunarræðu Unu Þorleifsdóttur, deildarforseta Sviðslistadeildar:

,,Á þessum 25 árum hefur mikil þróun átt sér stað bæði innan skólans og utan og sviðslistanám tekið miklum breytingum. Að deildinni og þróun náms hefur í gegnum árin komið stór og góður hópur fólks en á þessum tímamótum langar mig að minnast sérstaklega á þau er stóðu í stafni í upphafi – Hjálmar H. Ragnarson, fyrsta rektor LHÍ, og Ragnheiði Skúladóttur, fyrsta deildarforseti Sviðslistadeildar, en undir forystu þeirra var unnið mikið frumkvöðlastarf og grundvöllurinn fyrir þróun innan sviðslista og náms við LHÍ lagður til framtíðar. Frá upphafi var markmiðið að auka fjölbreytni og þekkingu innan fagsviðsins með því að bjóða upp á fleiri námsleiðir innan sviðslista en einungis leikaranám, sem sviðshöfundanám, alþjóðlegt samtímadansnám og síðar meistaranám í sviðslistum bera vitni um.“

Takk kæru gestir og fagaðilar fyrir komuna og samtalið.

Myndir: Eygló Gísladóttir.