Jafnrétti

Hlutverk og ábyrgð

Jafnréttisnefnd Listaháskóla Íslands fer með umsjón jafnréttismála innan skólans og starfar í umboði Rektors.  

Jafnréttisnefnd mótar stefnu og áætlanir skólans í málefnum er varða jafnræði, fjölbreytileika og inngildingu. Jafnréttisnefndin er leiðandi í lifandi umræðu um jafnréttismál og er sýnileiki nefndarinnar mikilvægur þáttur í því að rækta og hlúa að menningu þar sem jafnræði, fjölbreytileika og inngildingu er fagnað.  

Jafnréttisnefnd fylgist með stöðu jafnréttismála innan skólans sem utan, hefur yfirsýn yfir jafnréttislög og reglugerðir stjórnvalda og tryggir að jafnréttisumræða innan skólans sé í takt við síbreytilegan samtímann.  

Jafnréttisnefnd ber ábyrgð á gerð, framkvæmd og uppfærslu jafnréttisáætlunar. Að auki veitir nefndin hverri deild, stoðþjónustu og stúdentaráði stuðning við að setja sér aðgerðaráætlun um framfylgd jafnréttisáætlunarinnar. 

Jafnréttisnefnd tekur þátt í árlegum Jafnréttisdögum háskólanna með viðburðum innan skólans og utan.  

Netfang jafnréttisnefndar er jafnretti@lhi.is 

 

Nefndarskipan og fyrirkomulag

Í jafnréttisnefnd sitja fimm fulltrúar og eru þau fulltrúar jafnréttismála innan skólans.  

Nefndin er skipuð með eftirfarandi hætti:  

Fulltrúar starfsfólks eru þrjú og eru þau skipuð af framkvæmdaráði sem auglýsir eftir framboðum til setu í nefndinni. Við val á fulltrúum skal líta til þess að nefndin endurspegli fjölbreytileika skólasamfélagsins sem best. Fulltrúar starfsfólks eru skipuð að lágmarki til tveggja ára í senn og skal að lágmarki einn fulltrúi frá fyrra ári sitja í nefndinni til þess að tryggja samfellu í starfi nefndarinnar á milli skólaára.  

Stúdentaráð skipar einn fulltrúa nemenda sem situr að lágmarki eitt ár í nefndinni. 

Að auki situr jafnréttisfulltrúi skólans í nefndinni og er skipaður ótímabundið.  

Jafnréttisnefnd skal vera fullskipuð að vori fyrir komandi skólaár og kemur hún saman til fyrsta fundar innan mánaðar frá upphafi skólastarfs. Á þeim fundi kýs nefndin sér formann sem stýrir og skipuleggur starf nefndarinnar og boðar til funda. Jafnréttisnefndin fundar að jafnaði einu sinni í mánuði yfir skólaárið.  

Jafnréttisnefnd er heimilt að sækja sér utanaðkomandi þekkingu ár hvert. 

Jafnréttisfulltrúi Listaháskóla Íslands er skipaður af rektor. Jafnréttisfulltrúi vinnur náið með öllum deildum og sviðum skólans, situr í jafnréttisnefnd, fylgir framgangi jafnréttisáætlunar eftir og er, ásamt formanni nefndarinnar, fulltrúi jafnréttisnefndar í málum sem lögð eru fyrir framkvæmdaráð.  

Jafnréttisfulltrúi skal sjá til þess að jafnréttisáætlun sé starfsfólki og nemendum aðgengileg og sé sýnileg á heimasíðu skólans.  

Jafnréttisfulltrúi safnar og birtir árlega upplýsingar um framgang aðgerða jafnréttisáætlunar sem og stöðu inngildingarmála innan Listaháskólans almennt.  

Jafnréttisfulltrúi tekur á móti ábendingum, tillögum og umkvörtunum sem sendar eru jafnréttisnefnd og ber ábyrgð á því að þau séu tekin fyrir með formlegum hætti á fundi jafnréttisnefndar. 

Jafnréttisfulltrúi situr samráðsvettvang jafnréttisfulltrúa háskólanna þar sem unnið er að sameiginlegum verkefnum. 

Jafnréttisfulltrúi LHÍ er Katla Stefánsdóttir fötlunarfræðingur. 

Netfang: jafnretti@lhi.is  

Jafnréttisáætlunin er að jafnaði tekin til endurskoðunar á þriggja ára fresti en árlega fer nefndin yfir aðgerðir áætlunarinnar, metur árangur, mótar nýjar aðgerðir og, ef þurfa þykir, tekur hana til endurskoðunar. Hefja skal endurskoðun minnst ári áður en gildandi áætlun fellur úr gildi með það að markmiði að ný áætlun sé tilbúin þegar fyrri fellur úr gildi.  

Jafnréttisnefnd er heimilt að stofna starfshóp um áætlunina og endurskoðun hennar ef þörf er á. Nefndin hefur einnig heimild til þess að leita til starfsfólks Listaháskólans og utanaðkomandi sérfræðinga um ráðgjöf og álit ef ástæða þykir til.  

Breytingar á áætluninni krefjast samþykkis framkvæmdaráðs Listaháskólans.   

Jafnréttisáætlunin nær til alls starfsfólks og allra nemenda Listaháskólans sem í sameiningu bera ábyrgð á að koma í veg fyrir mismunun og leggja sitt af mörkum til þess að skapa samfélag inngildingar og jafnræðis. 

Hér er hægt að skoða jafnréttisáætlun LHÍ 2025-2028.

 

Viltu fá nánari upplýsingar um jafnréttismál í LHÍ? 

Ertu með ábendingar eða tillögur sem varða jafnréttismál í LHÍ?  

Hafðu samband í gegnum netfang jafnréttisnefndar LHÍ: jafnretti@lhi.is