Tvö sæmd nafnbótinni heiðursprófessor við Listaháskóla Íslands

Listaháskóli Íslands hefur sæmt tvo einstaklinga nafnbótinni heiðursprófessor fyrir einstakt framlag þeirra til lista, fræða og þróunar kennslu og rannsókna á fræðasviðinu listir.

Guðmundur Oddur Magnússon (Goddur) hefur verið útnefndur heiðursprófessor við hönnunardeild á grundvelli öflugs og áratugalangs framlags hans til kennslu og rannsókna á sviði lista og hönnunar, og mikilvirkrar menningarfræðslu á opinberum vettvangi síðustu áratugi. Sem fagstjóri og prófessor við hönnunardeild hefur hann gegnt lykilhlutverki við að móta faglega umræðu um hönnun á Íslandi og lagt ríkan skerf til háskólamenntunar kynslóða af skapandi hönnuðum.

Bryndís H. Snæbjörnsdóttir hefur verið útnefnd heiðursprófessor við myndlistardeild fyrir framlag sitt til rannsókna og háskólakennslu í myndlist og þróunar fagvettvangs myndlistar hér á landi sem og á alþjóðavettvangi, sem annar hluti tvíeykisins Snæbjörnsdóttir/Wilson, ásamt Mark Wilson. Bryndís er brautryðjandi í listrannsóknum og fyrsti íslenski myndlistarmaðurinn til að hljóta doktorsgráðu í sínu fagi. Í störfum sínum sem prófessor og fagstjóri meistarnáms í myndlist hefur hún haft mótandi áhrif á þróun náms- og rannsóknarumhverfis Listaháskólans.

Við óskum Bryndísi og Goddi innilega til hamingju með heiðurinn og þökkum þeim fyrir þeirra dýrmæta framlag til Listaháskólans og skapandi greina á Íslandi.