Rannsóknarstefna

Rannsóknarstefna Listaháskóla Íslands 2025-2028

Við Listaháskóla Íslands starfa listamenn og fræðimenn sem stunda rannsóknir í og á listum og í listkennslufræðum. Rannsakendur við skólann hafa akademískt frelsi til athafna.
Rannsóknir í listum (e. artistic research) fela í sér samþættingu listasköpunar, rannsókna og fræða á tilgreindu fagsviði eða í þverfaglegu samstarfi. Afraksturinn[1] er settur fram í samhengi sem getur falið í sér fagurfræðilegar, þekkingarfræðilegar, siðfræðilegar, pólitískar og samfélagslegar vísanir. Listaháskólinn gerir þá kröfu til rannsakenda sinna að niðurstöðum sé ætíð miðlað með opinberum og aðgengilegum hætti, til sérfræðinga jafnt sem almennings, hvort sem er á listrænum eða fræðilegum vettvangi. Það beina og milliliðalausa samband sem listirnar hafa við ólíka aldurshópa, leikna sem lærða, er einn styrkur fræðasviðsins þegar kemur að mati á ávinningi rannsókna þar sem samfélagsleg áhrif eru oft mikil og augljós.

Afrakstur rannsókna í listum er tvennskonar í senn: annars vegar verk og hins vegar greinandi umfjöllun. Með verki er átt við afrakstur í hvaða listformi sem er. Listaverkið sem afurð rannsóknarferlis er ávallt í forgrunni, en greinandi umfjöllun er leið til að veita innsýn í ferlið og vettvangur fyrir rannsakendur til að setja verk sín í tiltekið samhengi.

Markmið
1. Við skólann er öflug rannsóknarstarfsemi sem er knúin áfram af þekkingarleit og áræðni akademískra starfsmanna.
1.1. Rannsóknarverkefni starfsfólks eru grunnur allrar rannsóknarstarfsemi skólans. Rannsakendur hafa tíma til rannsóknarstarfs og sveigjanleika til þess að stunda það út frá forsendum hvers verkefnis.
1.2. LHÍ hvetur rannsakendur til að þróa verkefni sín og til að sækja um styrki eftir því sem við á.
1.3. Rannsakendur eru hvattir til rannsóknarsamstarfs innan skólans sem og utan, innanlands og erlendis.
1.4. LHÍ leggur áherslu á fjölbreyttan miðlunarvettvang rannsókna sem svarar þörfum ólíkra rannsakenda og viðfangsefna.
1.5. Við LHÍ eru heilindi rannsókna og siðferði þeim tengdum í fyrirrúmi.

2. Rannsóknir við LHÍ hafa áhrifamátt á alþjóðavísu og eru í samtali við íslenskt samfélag.
2.1. Rannsóknarverkefni eru hreyfiafl í samfélaginu.
2.2. Rannsóknum er miðlað á opinberum vettvangi og hefur almenningur aðgengi að rannsóknarniðurstöðum.
2.3. Rannsakendur koma fram opinberlega sem sérfræðingar á sínu sviði.
2.4. LHÍ á í rannsóknarsamstarfi við aðrar stofnanir, hagaðila og fagfélög og þarfir samfélagsins hafa áhrif á þróun rannsóknarverkefna.
2.5. Listaháskólinn er virkur þátttakandi í alþjóðlegu samstarfi.

3. LHÍ veitir rannsakendum öflugan stuðning og tryggir gæði rannsókna þeirra á vettvangi Rannsóknarmiðstöðvar skólans.
3.1. Boðið er upp á reglulega þjálfun og stuðning við rannsakendur eftir því sem við á.
3.2. Haldið er utan um öflugt og umbótamiðað rannsóknarmat.
3.3. Reknir eru sterkir innri rannsóknasjóðir sem úthlutað er úr á grundvelli gæða.
3.4. Gæði rannsókna og rannsóknarumhverfis eru metin árlega.

4. Við LHÍ njóta nemendur góðs af rannsóknarvirkni starfsfólks og hafa möguleika á því að þróa með sér rannsóknarhugarfar á meðan á námstíma þeirra stendur.
4.1. Rannsakendur nýta eigin rannsóknir í kennslu þar sem unnt er að koma því við.
4.2. Nemendur kynnast aðferðum rannsókna á öllum námsstigum.
4.3. LHÍ hvetur til sóknar í Nýsköpunarsjóð námsmanna.
4.4. Nemendur fá tækifæri til þess að taka þátt í rannsóknum starfsfólks.
4.5. Meistaranemar taka þátt í nefndum og ráðum skólans á sviði rannsókna.

5. Doktorsnám í listum verður í boði þegar viðurkenning ráðuneytis liggur fyrir.
5.1. Doktorsnám í myndlist og doktorsnám í tónlist leggur grunn að áframhaldandi þróun doktorsnáms í listum.
5.2. Fjölbreyttur hópur akademísks starfsfólks hefur færni til að sinna leiðbeiningu doktorsnema.
5.3. Deildir hafa skýra framtíðarsýn á rannsóknarstarf og þróun innan viðkomandi faggreinar sem styður við nám á þriðja þrepi.
5.4. Formleg umgjörð er um rannsóknarnám á þriðja þrepi.
5.5. LHÍ á í formlegu samstarfi við leiðandi listaháskóla erlendis um þjálfun og stuðning við doktorsnema.