MA í sviðslistum

Umsækjendur skulu skila inn prófskírteinum og ítarlegum námsferli með námsferilsskrá fram að deginum í dag. Hægt er að skila skjölum á íslensku eða ensku. 

Umsækjendur verða að skrifa kynningarbréf á ensku (hámark 3 bls í A4) um ástæður þess að þau sækja um námið og um valið sérsvið (leikstjórn, leikritun, sviðshöfundur eða kóreógrafía). Vinsamlegast útskýrið eftirfarandi atriði:

• Hvaða listrænu reynslu þú hefur og hvernig sú reynsla hefur leitt til ákvörðunar um að hefja nám.
• Þá hæfni sem þú býrð yfir og mun gagnast þér í náminu og innan valins sérsviðs.
• Listræna sýn þína og helstu áhugasvið innan valins sérsviðs.
• Settu fram eigin listrænu spurningu á viðkomandi sérsviði sem þú vilt rannsaka í námi þínu.
• Útskýrðu hvað í þinni eigin reynslu innan sviðslista og námi hefur leitt þig að þessari tilteknu spurningu.
• Útskýrðu hvernig þú telur að þetta meistaranám muni hjálpa þér að dýpka hæfni þína.

Umsækjendur verða að skila inn ferilskrá á ensku. Ferilskráin ætti ekki að vera lengri en tvær síður og innihalda listræn verkefni. 

Myndir, textar, upptökur, hljóð og/eða myndband (tenglar á Dropbox, Youtube, Vimeo o.s.frv.).  

Umsækjendur skulu safna saman sýnishornum af verkum sínum í ferilmöppu (e. portfolio). Mappan skal innihalda fjögur sýnishorn, sem eiga að endurspegla umsækjandann og varpa ljósi á áhugasvið og helstu hugðarefni hans innan sviðslista. Úr sýnishornum á að vera hægt að lesa listræna hugsun umsækjanda og getu hans til framsetningar á hugmyndum sínum.

Jafnframt eiga umsækjendur að skrifa samantekt um hvert sýnishorn þar sem þeir greina frá hlutverki sínu innan verkefnisins, listrænni sýn sinni, vinnuferli og aðferðum, og hvernig verkefnið endurspeglar helstu hugðarefni umsækjanda innan sviðslista. Hver samantekt ætti ekki að vera lengri en 2-3 bls.

Athugið að ekki er óskað eftir verkum í fullri lengd og umsækjendur eru hvattir til þess að velja fremur styttri hluta af lengri verkum svo inntökunefnd hafi færi á að fara yfir öll gögn í ferilmöppum umsækjenda. 

Skila á ferilmöppu/portfolio með eftirfarandi hætti:
Umsækjendur skila inn möppu á rafrænu formi. Mappan þarf að vera á .pdf formi og á allri möppunni að vera skilað sem einu .pdf skjali. Hljóðverk, videóverk og sambærileg skjöl skulu send sem virkir hlekkir/slóð inni í möppunni. Rafrænni möppu er skilað inn í rafrænu umsókninni undir ,,Umsóknar ferilmappa/portfolio” eða ,,Tenglar”. 

• Hugmyndaauðgi: Hæfni umsækjanda til að fylgja innsæi sínu og finna hugmyndum sínum farveg með skapandi hætti.   

• Áræðni: Horft er til forvitni,  frumkvæðis og sjálfstæðra vinnubragða umsækjanda í listrænni vinnu, túlkun, úrvinnslu hugmynda og framsetningu.    

• Formskynjun: Meðvitund um möguleika og mörk þeirra tjáningarforma sem umsækjandi velur sér.   

• Uppbygging: Hæfni umsækjanda til samsetningar skriflegra eða  verklegra verkefna. Horft er m.a. til flæðis, samhengis og dramatúrgíu, beitingu stílbragða og  uppbrota við merkingarsköpun.    

• Ígrundun: Hvernig umsjækendi fjallar um eigin verkefni, listræna sýn og vinnuferli.  

MA nám í sviðslistum er alþjóðlegt nám sem fer fram á ensku og íslensku. Nemendur skulu hafa góða enskukunnáttu, bæði í töluðu og rituðu máli, í fræðilegu samhengi. Umsækjendur gætu þurft að leggja fram gögn um enskukunnáttu sína. 

Hópverkefni sem inntökunefnd setur fyrir, þar sem umsækjendur geta sýnt fram á samvinnu- og samskiptahæfni sína

Kynning þar sem umsækjandi lýsir og ræðir við inntökunefnd um listrænt verkefni sem hann hefur þegar lokið. Kynningin, ásamt umræðum, ætti ekki að vera lengri en 20 mínútur.

Spurningar til að hugsa um fyrir kynninguna:  

• Hvernig var ferlið?
• Hvert var hlutverk þitt innan þess?
• Hvaða aðferðir og nálganir notaðir þú?
• Hvað myndir þú gera öðruvísi?
• Hvernig endurspeglar þetta verkefni listræna sýn þína?
• Hvað myndir þú þróa áfram og hvernig?

Viðtal við inntökunefndina – 30 mínútur.

Dæmi um spurningar:  

• Hvers vegna hefur þú áhuga á sviðslistum?
• Hvers konar sviðslistir veita þér innblástur?
• Hvers vegna velur þú þessa sérgrein?
• Spurningar um aðferðir og nálganir umsækjanda, sem og um reynslu innan sviðslista
• Spurningar sem tengjast inntökuferlinu

• Vinnusiðferði: Viðhorf umsækjanda til vinnu og náms og hæfni umsækjanda til sjálfstæðrar vinnu og samvinnu. Horft er til sjálfstæðis og frumkvæðis umsækjanda. Einnig því hvernig viðkomandi tekur gagnrýni og hugmyndum annarra og nýtir í listrænni vinnu.    

• Samskiptahæfni og gagnrýnin hugsun: Hæfni umsækjanda til að tjá sig um eigin vinnu, þau verkefni sem viðkomandi velur sér og sem lögð eru fyrir. Sem og hæfni umsækjanda til þess að tjá sig á gagnrýninn hátt um samtímalistir, sér í lagi sviðslistir.   

• Ígrundun: Hæfni umsækjenda til að tjá sig um eigin verkefni, vinnuferli, aðferðir og nálganir. Sem og um listræna sýn sína og áhugasvið innan sviðslista.