Rytmísk söng- og hljóðfærakennsla B.Mus.Ed

Information is provided in Icelandic for study programmes that have Icelandic as the primary language of instruction.

Um námið

Námið býður upp á fjölþætta menntun í rytmískum hljóðfæraleik eða söng. Meginmarkmiðið er að nemendur séu færir um að kenna á aðalhljóðfæri sitt, en séu auk þess vel þjálfaðir í helstu hliðargreinum rytmískrar tónlistar, s.s. spuna og samspili, og hafi auk þess á valdi sínu grunnfærni á algengustu hljóðfæri rytmísks samspils. Öflugt samstarf er við ryþmískar deildir erlendra tónlistarháskóla, sérstaklega á Norðurlöndunum. Þannig gefst nemendum á stundum tækifæri til að fara í námsferðir og víkka sjóndeildarhring sinn gegnum það að vinna með stærri hópi nemenda og kennara af ýmsu þjóðerni. Auk þess fær námsleiðin reglulega heimsóknir frá innlendum og erlendum gestakennurum.  

Uppbygging náms

Námið er þriggja ára bakkalárnám (BMus.Ed).blanda af einkatímum á aðalhljóðfæri hjá mörgum af fremstu ryþmísku hljóðfæraleikurum landsins og samspilskennslu, enda er hverskyns samspil helsta birtingarmynd ryþmískrar tónlistar. Áhersla er á kennslufræðitengdar greinar og önnur fræði. Nemendur fá einnig yfirgripsmikla þjálfun á aukahljóðfæri sem nýtast við samspilskennslu (píanó, gítar, bassa, trommur, handslagverk og song). Möguleikar nemenda á að þroskast sem flytjendur eru því umtalsverðir. Meðal sértækra námsgreina má nefna spunatækni, samspil, rytmíska kennslufræði, samspilskennslu, útsetningar, stjórnun, hljóðtækni og sálfræði.  

Að loknu námi

Miðað er við að nemendur búi við námslok yfir góðri þekkingu á víðu sviði rytmískrar tónlistar sem nýtist þeim við kennslu við ólíkar aðstæður í fjölbreyttu samfélagi. Námið opnar fyrir möguleikann á áframhaldandi námi á meistarastigi við erlenda tónlistarháskóla. Þá stendur til boða að mennta sig til kennsluréttinda í listkennsludeild LHÍ.