Inda – stafræn gagnvirk list og hönnun

Námið sameinar forritun, sköpun og gagnvirkni á einstakan hátt þar sem fjölbreyttar tjáningarleiðir eru þjálfaðar. Inda leggur áherslu á leikgleði, tilraunir, sjálfstæð vinnubrögð í hugsun og framkvæmd. Í náminu öðlast nemendur tæknilega færni og hugmyndafræðilegan grunn til að starfa á breiðu sviði, allt frá stafrænni miðlun og nýjum formgerðum í samtímalist, til leikja- og kvikmyndagerðar.

UM NÁMIÐ

Inda er grunnnám fyrir fólk með ólíkan bakgrunn sem vill vinna skapandi með tækni og gagnvirka miðlun. Nemendur nota forritun sem listrænan miðil og þróa gagnvirk verk, frásagnir og upplifanir þar sem stafrænir og hlutbundnir þættir fléttast saman. Í náminu tileinka þeir sér læsi og tæknilega færni á fjölbreyttum miðlum; svo sem sýndarveruleika, gervigreind, róbótum og leikjum. Áhersla er lögð á tilraunir, frumkvæði og skapandi lausnaleit.

Inda er íslenskt kvenmannsnafn sem ber með sér mýkt og er auðvelt fyrir útlendinga að bera það fram. Nafnið er jafnframt skammstöfun fyrir Interactive Digital Art & Design og endurspeglar þær áherslur sem eru til staðar í námi við Indu.

Með því að tengja saman listir, hönnun, vísindi og samfélag þróa nemendur fjölbreyttar nálganir í gagnvirkri sköpun. Þeir vinna með siðferðileg og samfélagsleg álitamál í stafrænu umhverfi og greina hvernig tækni mótar menningu, upplifun og samskipti.

Kennsla fer fram með verklegum tilraunum og samstarfsverkefnum þvert á faggreinar. Nemendur vinna hugmyndir í gegnum tilraunir, prófanir og skapandi þróun. Samhliða verklegri þjálfun er lögð áhersla á gagnrýna hugsun, frumkvæði og samvinnu í teymum listamanna, hönnuða, fræðafólks og tæknisérfræðinga. Auk þess öðlast nemendur þjálfun í listrænni stjórnun og frumkvöðlastarfi.

Útskrifaðir nemendur brúa bil milli listrænna og tæknilegra teyma. Skapandi hönnuðir og listafólk sem getur skrifað kóða, þróað hugmyndir og mótað framtíð gagnvirkra miðla.

Uppbygging náms

Námið sem er til þriggja ára er 180 einingar og samanstendur af fræðilegum námskeiðum, tæknilegri þjálfun og verklegum vinnustofum. Það byggir á þverfaglegri nálgun þar sem samstarf lista-, vísinda- og tæknigreina skapar fjölbreytt lærdómsumhverfi. Kennsla fer fram í fyrirlestrum, á verkstæðum og í sameiginlegu vinnurými nemenda, bæði í húsnæði Listaháskólans og Háskólans í Reykjavík.

Námið er nemendamiðað og gefur hverjum og einum svigrúm til að þróa eigin áherslur. Hlutverk kennara er að leiðbeina um skapandi ferli, tæknileg verkfæri og gagnrýna hugsun sem styður þekkingarleit nemandans. Áhersla er lögð á samtal, samvinnu og greiningu verka í samhengi. Námsmat eru skriflegar umsagnir og einkunnagjöf.

Fyrsta ár – undirstöðuatriði

Á fyrsta ári er lögð áhersla á að byggja upp grunnþekkingu og færni. Nemendur kynnast skapandi aðferðum, forritun, ýmis konar tækni og verkfærum til gagnvirkrar miðlunar. Þeir kynnast einnig grunnvinnu í hönnunarferlum, rannsóknum og aðferðum. Nemendur vinna saman í teymum að tilgreindum æfingum og verkefnum í verklegum skyldunámskeiðum. Verklegir áfangar byggja á röð verkefna og æfinga sem verða meira krefjandi eftir því sem á líður. Námið fer fram í heimastofu og sækja nemendur þar ýmis námskeið, gera tilraunir og vinna að því að byggja upp samfélag í gegnum samvinnu.

Annað ár – Sérhæfing í gegnum samvinnu

Á öðru ári verður sérhæfing meiri og nemendur kafa dýpra í aðferðir og möguleika stafrænnar, tæknistuddrar og gagnvirkrar sköpunar. Nemendur geta einnig sótt valnámskeið í HR og LHÍ eftir áhugasviði og áherslum í námi. Nemendur vinna sjálfstætt og í hópum sem og að sameiginlegu verki sem sýnt er í lok annar. Einnig geta nemendur sótt um skiptinám og starfsnám.

Þriðja ár – Sérhæfing og framtíðarsýn

Megnið af þriðja námsári einbeita nemendur sér að sínu sérsviði, samþætta verkefni og valgreinar og þróa eigin lokaverkefni. Einnig vinna nemendur saman að sameiginlegu verki. Nemendum gefst tækifæri á að vinna lokaverkefni sitt í samstarfi við fyrirtæki og stofnanir í greininni.

Að loknu námi

Að loknu námi hafa nemendur öðlast færni til að vinna að sjálfstætt og í teymum að fjölbreyttum verkefnum á sviði listtölvunar, gagnvirkrar miðlunar og nýsköpunar.

Námið veitir traustan grunn til áframhaldandi sérhæfingar og undirbýr nemendur vel fyrir framhaldsnám á meistarastigi innan skapandi greina, hönnunar og tækni.