Gréta Jónsdóttir – viðtal

Gréta Jónsdóttir er meistaranemi í listkennsludeild LHÍ

„Ég fæddist í Austin Texas og ólst þar upp til sex ára aldurs. Síðan flutti ég og fjölskyldan mín til Íslands og hef ég búið á Íslandi síðan og hef búið lengst í Breiðholti.“

Eftir grunnskólagöngu sína valdi Gréta að fara í Fjölbrautaskólann í Breiðholti og útskrifaðist þaðan sem stúdent af myndlistarbraut.

„Í framhaldi af því sótti ég um í myndlistardeild Listaháskóla Íslands og útskrifaðist þaðan árið 2020. Eftir útskrift frá LHÍ hélt ég áfram í námi og lauk viðbótardiplómu í kynfræði (e. sexology) við Háskóla Íslands. Skömmu síðar fór ég að velta því fyrir mér hvernig ég gæti sameinað þekkingu mína og áhuga minn á myndlist, kynfræði og vinnu með fólki, þá fannst mér liggja beinast við að fara í listkennslufræði við LHÍ.“

Að mati Grétu er námið í listkennsludeild fjölbreytt og býður upp á marga möguleika fyrir ólíka einstaklinga.

„Það er auðvelt að sníða námið að eigin áhugasviðum, meðal annars vegna fjölbreytts vals á námskeiðum. Það sem hefur gagnast mér sérstaklega vel er að fá að kynnast ólíkum kennurum og þeirra kennsluháttum ásamt því að fá að spreyta mig á að kenna og vinna verklegar kennsluæfingar.

Ein af ástæðunum fyrir því að Gréta valdi að snúa aftur í nám við LHÍ er hversu persónumiðað og aðgengilegt námið er.

„Samskipti við kennara og stjórnendur eru einföld og maður finnur að það er raunverulegur vilji til að styðja nemendur. Auk þess sé ég tækifæri í að halda námskeið og smiðjur fyrir ólíka hópa,“ segir Gréta en áður en hún hóf nám í listkennslufræði starfaði Gréta sem stuðningsráðgjafi á sambýli og nýtti, samhliða vinnunni, frítíma sinn í eigin sköpun.

Gréta hefur alltaf notið þess að vera í námi. Þegar hún var í Fjölbrautaskólanum í Breiðholti kviknaði fyrst sú tilfinning að henni gæti þótt gaman að kenna.

„Mér fannst sérstaklega spennandi þeir möguleikar sem fylgja því að kenna listgreinar – bæði hvað varðar að þróa eigið námsefni, prófa ólíkar kennslunálganir og skapa rými fyrir skapandi ferli. Kennsla í listum býður upp á gagnkvæm áhrif, þar sem nemendur og kennarar fá innblástur, það finnst mér heillandi.“

Gréta er á seinustu önn sinni í náminu í listkennsludeild og stefnir að útskrift í júní.

„Framundan hjá mér er að hefja vinnu við lokaverkefnið mitt og halda áfram að þróa mig sem kennara. Ég sé fyrir mér marga möguleika að loknu námi, en draumurinn minn er að kenna myndlist hvort sem það er á grunn- eða framhaldsskólastigi.“