BirkiVist: „Birki í menningu, listum og lífinu“

Málþingið BirkiVist: „Birki í menningu, listum og lífinu“ var haldið í Norræna húsinu föstudaginn 29. ágúst.

Málþingið var haldið á vegum rannsóknarverkefnisins BirkiVist: Endurheimt birkivistkerfa á 21. öld og þar voru m.a. kynntar niðurstöður þess hluta verkefnisins sem snýr að samfélagslegu, menningarlegu og fagurferðilegu gildi birkis.

BirkiVist er þverfræðilegt rannsókna- og þróunarverkefni er miðar að þróun skilvirkra leiða við endurheimt birkiskóga á landsvísu. BirkiVist er samstarfsverkefni HÍ, LbHÍ, LHÍ, Skógræktarinnar og Landgræðslunnar.

Í verkefninu eru greindar helstu hindranir og tækifæri fyrir náttúrulegt landnám birkis og hvernig samfélagslegir þættir hvetja eða letja endurheimt. Einnig eru metin ávinningur og afleiðingar endurheimtarinnar fyrir kolefnisbindingu, vatnsbúskap, líffræðilega fjölbreytni, landslag og fagurferði, auk þýðingar birkis í listum og menningu.

Nýnæmi verkefnisins felst m.a. í breiðri samvinnu milli margra aðila (þriggja háskóla og þriggja fagstofnana á sviði umhverfismála með samstarfi við fleiri stofnanir, skóla og sprotafyrirtæki) og sem leggja til ólíka sérþekkingu og gagnagrunna. Afraksturinn mun hjálpa Íslandi að uppfylla markmið Parísarsamkomulagsins og heimsmarkmið Sameinuðu þjóðanna og styrkja stefnumótun á sviði umhverfismála. Með BIRKIVIST er ætlunin að stuðla að skilvirkni, samfélagslegri sátt og aukinni þátttöku almennings í endurheimtarverkefnum.

Sjá nánar á vef verkefnisins.

Dagskrá málþingsins og mælendur má sjá nánar hér.