Uppskeruhátíð NAIP í Skálholti

Nemendur í meistaranámi tónlistardeildar Listaháskóla Íslands sýna afrakstur vikudvalar sinnar í Skálholti fimmtudaginn 25. september. Viðburðurinn hefst í kirkjunni þar sem flutt verða verk og verkefni nemenda en að því loknu ganga gestir saman yfir í Skálholtsbúðir þar sem dagskráin heldur áfram í Oddsstofu. Gangan milli staðanna er hluti af heildarupplifuninni.

Verkefnið er hluti af meistaranámi í Sköpun, miðlun og frumkvöðlastarfi (NAIP) og tónsmíðum við LHÍ, og fer fram undir handleiðslu Berglindar Maríu Tómasdóttur og Sigurðar Halldórssonar.

 NAIP er tveggja ára fjölþjóðlegt meistaranám sem starfrækt er í samstarfi við Konunglega tónlistarháskólann í Haag og Prince Claus tónlistarháskólann í Groningen í Hollandi.

Í náminu er lögð áhersla á samvinnu ólíkra strauma og listgreina, listræna stjórnun, verkefnastjórnun og samfélagslega tengingu. Nemendur fá þannig tækifæri til að víkka sjóndeildarhring sinn og þróa aðferðir sem geta nýst á breiðum vettvangi í síbreytilegu menningar- og samfélagsumhverfi.

Viðburðurinn í Skálholti er öllum opinn og aðgangur ókeypis.