Í maí 1964 var Feneyjaskráin (e. The Venice Charter) samþykkt á II. alþjóðaráðstefnu endurbyggingararkitekta og -tæknimanna í Feneyjum. Feneyjaskráin er samþykkt um grundvallarreglur eða viðmið (e. guidelines) um varðveislu og endurbyggingu minja og minjastaða. Í kjölfarið voru hin alþjóðlegu varðveislusamtök ICOMOS stofnuð til þess að fylgja samþykktinni eftir. Íslandsdeild ICOMOS stendur fyrir fyrirlestrinum sem fjallar um inntak Feneyjaskrárinnar og áhrif hennar á húsvernd á Íslandi. 

Alma Sigurðardóttir er með BA gráðu í arkitektúr frá Glasgow School of Art, MA gráðu í Listkennslu frá Listaháskóla Íslands og MSc gráðu í hönnun og varðveislu bygginga frá University of Strathclyde. Alma starfar sem verkefnastjóri við húsadeild Þjóðminjasafns Íslands ásamt því að vera í stjórn alþjóðlegu varðveislusamtakanna ICOMOS á Íslandi.

María Gísladóttir er arkitekt, með BA gráðu frá Listaháskóla Íslands og MA frá Arkitektaskólanum í Árósum. María starfar sem arkitekt hjá Minjastofnun Íslands.