Nemendur á þriðja ári í vöruhönnun við Listaháskóla Íslands opna sýningu þann 31. október í Elliðaárstöð. Sýningin „Enginn er eyland“ er afrakstur hópverkefnis þar sem nemendur kanna hvernig Ísland gæti starfað án tengingar við umheiminn, með því að nýta auðlindir sem eru nú þegar til staðar.

Nemendur settu sig í hlutverk íbúa í súrrealískum raunveruleika, innrömmuðum af þeim skilyrðum sem Sigríður Hagalín Björnsdóttir setur upp í þekktri skáldsögu sinni Eylandi. Þar hefur Ísland misst allt samband við umheiminn af óþekktum ástæðum og í gegnum söguna fylgjumst við með einstaklingum, samfélagi og þjóð þróast í því samhengi. Á svipaðan hátt hafa nemendur myndað lítið samfélag sem er brugðið upp í mynd íbúa í blokk og rétt eins og í samfélagi á stærri skala eru þar ólíkir íbúar með ólíkar þarfir og þekkingu en á sama stað með sömu takmarkanir. Verkefnin eru því frábrugðin í anda íbúanna, en varpa fram fjölmörgum spurningum um hvað það sé sem skipti máli, hvenær og fyrir hvern.