Sara Rós Hulda Róbertsdóttir
BA hljóðfæratónsmíðar

Sara Rós Hulda Róbertsdóttir útskrifast með bakkalárgráðu í hljóðfæratónsmíðum frá Listaháskóla Íslands. Útskriftarverk hennar, Stúlkan sem var, verður flutt í Seltjarnarneskirkju laugardaginn 13.apríl kl.16:00. Sinfóníuhljómsveit áhugamanna flytjur verkið og stjórnandi er Óliver Kentish. 

Stúlkan sem var

Verkið er samið fyrir sinfóníuhljómsveit og er innblásið af ljúfsárri og harmþrunginni reynslu móður tónskáldsins. Það lýsir í fimm köflum einstakri vináttu tveggja ungra stúlkna, sem hlaut brattan og ótímabæran endi er önnur þeirra var myrt með hrottalegum hætti í Kaupmannahöfn sumarið 1990, þegar þær voru báðar 18 ára. Fyrsti kafli verksins reynir að fanga æskuljómann og gleðina sem einkenndi vináttu stúlknanna þegar þær voru börn. Í öðrum kafla má greina aðeins fullorðinslegri blæ, þegar stelpurnar þroskast og upplifa ást og vonbrigði unglingsáranna. Þriðji kafli lýsir hrottalegu morðinu og lamandi sorginni sem því fylgdi hjá ástvinum fórnarlambsins. Fjórði kaflinn íhugar afleiðingar morðsins til lengri tíma og loks endar verkið á fimmta kaflanum, sem er nokkurs konar óður til lífsins og þess að gleðjast yfir dýrmætum minningum. Verkinu fylgir smárit þar sem móðir tónskáldsins lýsir þessari lífsreynslu í eigin orðum á persónulegan og einlægan hátt.

Sara Rós Hulda Róbertsdóttir

bw_sara_ros-4.jpg
 

Sara Rós (f. 2002) hóf tónlistarnám sitt í Tónlistarskóla Stykkishólms 6 ára gömul, fyrst einungis í píanónámi, en bætti 10 ára gömul á sig námi á franskt horn og síðar söngnámi ofan á tvöfalt hljóðfæranám. Hún byrjaði ung að semja sína eigin tónlist, og frumflutti meðal annars eigið píanóverk á tónleikum Kítón í Stykkishólmi 15 ára gömul. Að loknu stúdentsprófi lauk hún lagasmíðanámi í Engelsholm lýðháskólanum í Danmörku og hóf svo nám í hljóðfæratónsmíðum við Listaháskóla Íslands haustið 2021, með Hildigunni Rúnarsdóttur sem aðalkennara. Samhliða tónsmíðanáminu hefur hún undanfarin tvo ár einnig stundað fullt hornnám við LHÍ. Meðan á námi hennar hefur staðið hefur hún samið fjölda fjölbreytta verka, má þar nefna verk fyrir kammerhópa, einleikshljóðfæri, kór og tónlist fyrir stuttmyndir. Einnig hafa tvenn verk eftir hana verið frumflutt í sumartónleikaröð Skálholtskirkju. Stúlkan sem var, sem hér er frumflutt af Sinfóníuhljómsveit áhugamanna, er lokaverkefni hennar til B.A. prófs í hljóðfæratónsmíðum við LHÍ.