Hljóðfæraleikur
Markmið hljóðfærabrautar er að mennta fjölhæft tónlistarfólk með góða þekkingu, leikni og hæfni í sínu fagi. Lögð er áhersla á víðtæka þekkingu og skilning á tækni, aðferðum og stíltegundum í tónlist, flutningi hennar og túlkun. Nemendur skulu hafa innsæi til að nálgast viðfangsefni greinarinnar á einstaklingsbundinn hátt. Við deildina öðlast nemendur víðtæka reynslu í einleik og ýmis konar samspili.
Hóptímar og masterklassar eru vettvangur þar sem nemendum er leiðbeint af öðrum en aðalfagkennurum sínum. Margir íslenskir og erlendir gestakennarar heimsækja deildina á hverju ári. Kammertónlist og samspil eru mikilvægur þáttur í náminu ásamt námskeiðum í barokktónlist, samtímatónlist og sviðsframkomu. Einnig eru námskeið í grunnatriðum hljóðfærakennslu sem gera námið við deildina enn fjölbreyttara og áhugaverðara.
Að loknu bakkalárnámi í hljóðfæraleik og söng fara nemendur oftast utan til frekara náms en aðrir velja meistaranám við LHÍ í kennslufræði eða skapandi miðlun.
Fagstjóri hljóðfærabrautar er Peter Máté, prófessor í hljóðfæraleik.
Námið við deildina er góður grunnur fyrir atvinnuhljóðfæraleikara framtíðarinnar. Vegna fjölbreytni í fræði- og valfögum LHÍ, getur námið einnig nýst fyrir menningartengd störf í fjölmiðlum og við listastofnanir.
Hljóðfæranám from Listaháskóli Íslands - IUA on Vimeo.
