Fyrir hverja er námskeiðið/Námsstig: Námskeiðið er opið bæði arkitektum og hönnuðum sem vilja bæta við sig þekkingu í faginu og öllu áhugafólki um hönnun og arkitektúr. Námskeiðið er á BA stigi.  

Í námskeiðinu verður fjallað um alþjóðlega vöruhönnun frá tíma Bauhaus skólans til dagsins í dag. Farið verður í gegnum helstu strauma og stefnur tímabilsins, með áherslu á að tengja verk einstakra hönnuða og hönnunarhópa við þær samfélagslegu aðstæður sem þau spretta upp úr. Fjallað verður um áhrif tækninýjunga, lífsstílsbreytinga, menninarblöndunar, efnahagskreppu og hverskyns samfélagslegs umróts á þróun vöruhönnunar.

Námsmat: Skriflegt verkefni og próf

Kennari: Tinna Gunnarsdóttir sem hefur verið sjálfstætt starfandi vöruhönnuður frá árinu 1993 nam hönnun í Bretlandi (1988-1992) og á Ítalíu (1997). Hún hefur kennt við Listaháskóla Íslands frá stofnun hans, og var um árabil fagstjóri í vöruhönnun og er núna prófessor við skólann. Árið 2014 lauk Tinna meistaragráðu í rannsóknum með áherslu á vöruhönnun frá University of Brighton en í meistaraverkefni sínu velti hún fyrir sér hvernig hægt sé með inngripi vöruhönnuðarins að auðga upplifun fólks í villtri náttúru með sem minnstri umhverfisröskun.

Vöruhönnun er óaðskiljanleg samtímanum og ekki hægt að hugsa sér samfélag mannanna án hennar.  Hönnun í stóra samhenginu er flókið fyrirbrigði og yfirgripsmeira en svo að hægt sé að skilja það til fulls. Vöruhönnun, eins og önnur svið hönnunar, er hreyfiafl, hún á sér sitt sjálfstæða líf, teygir anga sína í allar áttir og ratar inn í ólíklegustu afkima mannlegrar tilveru. Hún leitar stöðugt nýrra leiða, þjónar okkur og ögrar… henni er ekkert óviðkomandi.“ – Tinna

 

Staður og stund: Þverholt 11, þriðjudagar kl. 10:30-12:10

Tímabil: 22. ágúst - 24. október

Forkröfur: BA gráða í arkitektúr og hönnun eða sambærilegt nám

Nánari upplýsingar: Eva María Árnadóttir, verkefnastjóri hönnunar- & arkitektúrdeildar: evamaria@lhi.is