Ýr Jóhannsdóttir

Í fyrsta kafla ritgerðarinnar fer ég yfir mitt samband við textíl, bæði í persónulegu lífi og í starfi mínu sem textílhönnuður. Þar ígrunda ég reynslu mína í námi og starfi þar sem ég skoða ferlið sem leiddi mig út í að miðla verkefnum mínum áfram í fræðslu og kennslu.

 

Í fræðikafla ritgerðarinnar tek ég fyrir vandamálið sem fylgir nútíma textílframleiðslu. Þar fer ég yfir áhrif framleiðsluferlisins, samverutíma okkar með textílnum og hvar hann endar. Í kaflanum skoða ég lausnir eins og fataviðgerðar smiðjur og hvernig nálgun samfélagslista og félagslegrar hugsmíðahyggju nýttist mér við skipulag og útfærslu smiðjanna. Einnig ígrunda ég valið á efnivið í textílkennslu í skólakerfinu og mikilvægi þess að innleiða þangað notkun á notuðum textíl.

 

Í lokakafla ritgerðarinnar fer ég yfir tímabilið á Hönnunarsafni Íslands, hvernig ég skipulagði opnu vinnustofunnar og skapandi fataviðgerðarsmiðjurnar, og geri það með því að rýna í rannsóknardagbók sem ég hélt á tímabilinu og ljósmyndum sem ég tók á smiðjunum.

 

Niðurstöður rannsóknarinnar varpa fram mikilvægi þess að deila þekkingu sinni og hvernig hlutverk kennarans getur aukið gildi og möguleika starfsins sem ég vinn sem textílhönnuður og listakona.