VELFERÐ: Vigdís Gunnarsdóttir

VELFERРer opin fyrirlestrarröð listkennsludeildar Listaháskóla Íslands skólaárið 2021-2022

 

 

Fyrirlestrarröðin fer fram í LHÍ Laugarnesi, Laugarnesvegi 91. Annar fyrirlestur er þriðjudaginn 1. mars kl. 15-16, í fyrirlestrarsal L193

 

Fyrirlesari: Vigdís Gunnarsdóttir, aðjúnkt og fagstjóri sviðslista við listkennsludeild

 

 

Í fyrirlestrinum fjallar Vigdís Gunnarsdóttir um tilraunir sínar til að brjóta niður veggi milli ólíkra hópa innan og utan framhaldsskólans með aðferðum lista.

 

Á síðustu árum hefur hún unnið með nemendum í Fjölbrautarskólanum í Garðabæ í áfanga sem hún kallar Betra samfélag. Áfanginn er kenndur á leiklistarbraut og byggir á samfélagsleikhúsi sem fellur undir samfélagslistir og hefur Vigdís verið að þróa nokkur samstarfsverkefni milli nemenda sinna og annarra hópa. Í fyrirlestrinum verður fjallað um þessi verkefni og upplifanir nemenda af því að vinna út frá samfélagsleikhúsi í samtali við eldri borgara, leikskólabörn og nemendur á starfsbraut.
 

Vigdís Gunnarsdóttir útskrifaðist sem leikkona frá Leiklistarskóla Íslands árið 1993 og lék hjá Þjóðleikhúsinu fram til ársins 2003. Hún lauk meistaranámi í skrifum og leikstjórn fyrir sjónvarp frá Goldsmiths Collage, University of London, árið 2002 og diplómanámi í listkennslu frá listkennsludeild LHÍ árið 2013. Samhliða kennslu við listkennsludeildina starfar  hún sem „freelance“ leikkona og er meðlimur í hljómsveitinni Heimilistónar.