Útskriftarviðburður LHÍ // Ágúst Ingi Ágústsson

Ágúst Ingi Ágústsson lýkur prófi í kirkjutónlist frá Listaháskóla Íslands þar sem orgelkennari hans hefur verið Eyþór Ingi Jónsson en einnig hefur Ágúst fengið kennslu í hljóðfæraleik og kórstjórn hjá Láru Bryndísi Eggertsdóttur, Peter Maté, Guðrúnu Óskarsdóttur, Kjartani Valdimarssyni og Magnúsi Ragnarssyni.

Ágúst lauk kantorsprófi frá Tónskóla þjóðkirkjunnar árið 1998 undir handleiðslu Harðar Áskelssonar en 2008 lauk hann einleiksáfanga við sama skóla þar sem Hörður var einnig orgelkennari hans. Ágúst starfaði sem organisti hjá kaþólsku kirkjunni í Hafnarfirði árin 1993–2000. Hann var stjórnandi gregorskórsins Cantores Iutlandiae í Danmörku árin 2011–2017 og árið 2018 stofnaði hann sönghópinn Cantores Islandiae ásamt Gísla Jóhanni Grétarssyni tónskáldi. Hópurinn leggur áherslu á gregorssöng í verkefnavali sínu en einskorðar sig þó ekki við hann. Fyrir utan tónlistariðkun starfar Ágúst sem læknir.