Kynning á nýju meistaranámi í arkitektúr við Listaháskóla Íslands verður fimmtudaginn 25. febrúar næstkomandi á Teams klukkan 12:00 - 13:00

Nú er hægt að sækja um alþjóðlegt meistaranám í arkitektúr við Listaháskóla Íslands í fyrsta sinn!
Umsóknarfrestur er 7. apríl 2021.
 
Við bjóðum ykkur velkomin á opinn kynningarfund um meistaranámið og umsóknarferlið - öllum spurningum verður svarað!
Fundurinn fer fram á ensku, deildarforseti arkitektúrdeildar Hildigunnur Sverrisdóttir og Katrín Helena verkefnastjóri deildarinnar sitja fyrir svörum.

 

Hvenær? 25. febrúar 2021 klukkan 12:00

Hvar? á Teams, smellið hér til að komast inná fundinn

 

Um meistarnám í arkitektúr:

Hönnunar- og arkitektúrdeild Listaháskóla Íslands var skipt upp í tvær deildir haustið 2020, hönnunardeild annars vegar og arkitektúrdeild hins vegar.
 
Undir arkitektúrdeild fellur námsbraut á BA stigi í arkitektúr og haustið 2021 mun bætast við námsbraut á meistaranámsstigi, MArch.
Hildigunnur Sverrisdóttir deildarforseti arkitektúrdeildar hefur undanfarna mánuði leitt undirbúning meistaranáms í arkitektúr ásamt samstarfsfólki sínu við deildina sem byggist á margra ára samtali og þróun um brautina. Kennarar við arkitektúr á meistaranámsstigi verða ásamt Hildigunni, Björn Guðbrandsson, Anna María Bogadóttir, Massimo Santanicchia, Steve Christer og Margrét Harðardóttir.
 
Þetta verður í fyrsta sinn sem arkitektúr er kenndur á meistarastigi á Íslandi og því í fyrsta sinn sem nemendum í arkitektúr gefst kostur á að ljúka fullnaðarnámi í arkitektúr hérlendis.
 
Meistaranám í arkitektúr við Listaháskóla Íslands er tveggja ára alþjóðlegt nám, árið skiptist milli haustannar þar sem nemendur vinna saman að rannsóknum og safna efni og þekkingu sem mun svo vera stuðningur við persónuleg hönnunarverkefni hvers nemanda á vorönn.
 
Námið verður að miklu leyti byggt á séreinkennum og viðfangsefnum hérlendis. Árlega mun þema liggja til grundvallar sameiginlegrar rannsóknar nemenda en einnig sem hluti af hönnunarferli hvers og eins. Fyrsta þemað verður torf og íslenskur byggingararfur og rýnt verður í hvað torfið getur kennt okkur í nútímasamhengi.