Tónsmíðar

Á tónsmíðanámsleið eru tvær námsleiðir á bakkalárstigi:
  • Hljóðfæratónsmíðar / Þriggja ára, 180 eininga BA-nám.  

    Í hljóðfæratónsmíðum liggur hefðbundin nótnaritun til grundvallar. Nemendur læra hljómfræði, tónbókmenntir og hljóðfærafræði en er jafnframt gefin innsýn í nýja hljóðfæratækni og heim raftónlistar. Í hóptímum og einkatímum tónsmíða er sjónum ávallt beint að tónsmíðaaðferðum 20. og 21. aldar. Frá fjórðu önn endurspegla fræðaáfangar fjölbreytt tónmál, tónsmíðatækni og hugmynda- og fagurfræði 20. og 21. aldar. Ennfremur má benda á möguleika í vali á námskeiðum í tónsmíðum nýmiðla og annarra deilda skólans.
     
  • Nýmiðlar / Þriggja ára, 180 eininga BA-nám.
    Í tónsmíðum nýmiðla læra nemendur undirstöður hljóðhönnunar, hljóðfræði og tónlistarforritunar. Jafnframt eru ólíkir möguleikar í ritun, gagnvirkni og miðlun tónlistar rannsakaðir. Í hóptímum og einkatímum tónsmíða er lögð áhersla á tónsmíðaaðferðir raf- og tölvutónlistar, tilraunatónlist og aðferðir þvert á listgreinar ásamt hugmynda- og fagurfræði 20. og 21. aldar. Frá fjórðu önn geta nemendur nýmiðla kosið sér áhersluleið með vali úr fjölbreyttri flóru námskeiða allt frá tónfræðagreinum til námskeiða við aðrar deildir skólans.


    Á fimmtu önn gefst síðan tækifæri til að semja fyrir og vinna með flytjendum sem sérhæfðir eru í flutningi nýrrar tónlistar. Nemendur tónsmíðanámsleiðar hafa kost á náinni samvinnu við aðrar deildir, m.a. við sviðslistadeild í ýmsum verkefnum sviðshöfunda, leikara og dansara.

    Tónsmíðanemendur vinna náið með hljóðfæra- og söngnemendum deildarinnar. Það samstarf kristallast í uppskeruhátíð tónlistardeildar, Ómkvörninni, sem haldin er í lok hverrar annar. Nemendur fá að auki tækifæri til að semja fyrir kór skólans eða Sinfóníuhljómsveit unga fólksins.

Fagstjóri tónsmíða á bakkalárstigi er bergrun [at] lhi.is (Bergrún Snæbjörnsdóttir), dósent.

Hér að neðan má nálgast hlaðvarpsþátt þar sem fjallað er um tónsmíðanámið.

 

Nafn námsleiðar: Tónsmíðar
Nafn gráðu: BA
Einingar: 180 ECTS
Lengd náms: 6 annir – 3 ár
 

MIKILVÆGAR UPPLÝSINGAR

Opnað fyrir umsóknir: 8. janúar 2024

Umsóknarfrestur: 12. apríl 2024

Umsóknum svarað: Maí/júní 2024

UMSÓKNIR

Rafræn umsókn
Sérleiðbeiningar brautar

HAFA SAMBAND

Bergrún Snæbjörnsdóttir, bergrun [at] lhi.is

FLÝTILEIÐIR

Tónlistardeild á Instagram
Skólareglur
Háskólalög
Skólagjöld LHÍ
Kennsluskrá LHÍ

 

 

Tónsmíðanámið í LHÍ er frábært. Við deildina starfar okkar allra besta fólk, frábær tónskáld, listamenn og fræðafólk. Það er dýrmætt að hafa svona vandaðar fyrirmyndir sem leggja sig mikið fram um að hjálpa manni að þróa eigin aðferðir og finna sinn tón.

Hilma Kristín Sveinsdóttir, tónskáld

LHÍ hefur reynst mér mjög vel, ég hef lært heilan helling og þróað mína list. Þetta hefur verið frábært ferli og fólkið sem ég hef kynnst munu vera ævilangir vinir mínir. Bæði kennarar og aðrir nemendur.

Magni Freyr Þórisson, tónskáld

„Engin menntun hefur verið mér eins dýrmæt og nýst mér jafn vel og bakkalárnámið við tónsmíðadeild Listaháskóla Íslands. Kennararnir eru í heimsklassa og leggja sig alla fram við að koma kunnáttu sinni og visku áleiðis til nemenda, hvort sem um fræðigreinar eða einkatíma í tónsmíðum er að ræða. Það sem ég kunni hvað mest að meta var það viðhorf sem ríkir við deildina - að taka nemendum eins og þeir eru og stuðla að því að þeir finni sínar eigin leiðir til að þroskast og dafna og finna sína eigin rödd.“

Bára Gíslasdóttir, tónskáld.

„Það er misskilningur að tónsmíðanám snúist einungis um nótur, hljómfræði eða kontrapunkt. Í LHÍ eru kennarar sem koma úr mörgum mismunandi áttum og hjálpa þér að móta hugmyndir þínar hvort sem þær eru einleiksverk fyrir píanó, kammerverk, margrása rafverk, hljóðskúlptúr eða gjörningur. Það er boðið upp á mikið frelsi og frábært tækifæri til þess að koma verkum sínum til skila í flutningi. Þú lærir að skoða tónlist frá mörgum sjónarhornum og beita gagnrýninni hugsun, jafnt í hugmyndafræðilegri sem verklegri vinnu. Tónsmíðanám er kjörið tækifæri fyrir alla tónlistarmenn til þess að tjá og þroska hugmyndir sínar um tónlist og gera úr þeim mögnuð tónverk.“
 

Pétur Eggertsson, tónskáld

Frá fagstjóra