Sif Beckers-Gunnsteinsdóttir

 

Ritgerðin fjallar um starfendarannsókn sem stóð yfir í 6 mánuði frá október 2019 til mars 2020. Eftir að hafa kennt í nokkur ár og kynnst fræðunum betur þá fann ég þörf fyrir að flétta þetta saman og skerpa á því hvernig kennari ég vil vera.

 

Ég vissi að ég vildi ekki kenna á sama hátt og mér var kennt í barnaskóla heldur vildi ég brjóta þá múra og ryðja leið fyrir nemendur til að finna sína rödd og skapa út frá eigin tilvist.

 

Ég hugsaði verkefnið út frá einstaklingnum og hans innra landslagi, skynjun á umhverfi sínu og hvernig hann tengist samfélaginu. Ég skoða meðal annars John Dewey og hans kenningar um lýðræði og jafnréttisgrundvöll, hugmyndafræði Mihaly Csikszentmihalyi um flæði (e. Flow), fyrirbærafræði Maurice Merleau-Ponty og gagnrýna kennslufræði (e. critical pedagogy) Paulo Freire og hugmyndafræði hans um valdeflingu einstaklingsins.

 

Helstu gögn sem ég notaði á meðan á rannsókn stóð voru rannsóknardagbók, ljósmyndir, óformlegar samræður og hljóðskrár sem ég safnaði sjálf.

 

 

Ferðalagið sem ég hef farið í, sem er þessi starfendarannsókn, hefur aukið mér sjálfstraust og gefið mér byr undir báða vængi. Ég hef áttað mig betur á því hvernig kennari ég vil vera.