Reglur um keppni um að fá að koma fram á
tónleikum með Sinfóníuhljómsveit Íslands
sbr. samning dags. 21.12.04, með breytingum
sept. 2007, sept. 2010 ág. 2018 og sept. 2020
1) Keppnin er árlegur viðburður á vegum Listaháskóla Íslands (LHÍ) og Sinfóníuhljómsveitar Íslands (SÍ).
LHÍ er framkvæmdaaðili keppninnar. Keppnin fer fram í tveimur umferðum.
Í fyrri umferð eru umsækjendur metnir eftir innsendum myndbandsupptökum og
þeim umsækjendum sem komast áfram er boðið í aðra umferð keppninnar.
Sigurvegarar koma fram á tónleikunum Ungir einleikarar með hljómsveitinni.
2) Keppnin er opin nemendum sem stunda nám í hljóðfæraleik eða
söng á háskólastigi (bakkalár-, meistara- eða doktorsstigi) og eru íslenskir ríkisborgarar eða
erlendir ríkisborgarar sem hafa verið búsettir á Íslandi í a.m.k. eitt ár.
Fyrrum sigurvegarar samkeppninnar eiga ekki möguleika á endurtekinni þátttöku.
3) Verkefnastjóri tónlistardeildar veitir upplýsingar um keppnina og tekur við umsóknum.
Með umsókn í keppnina samþykkir þátttakandi að hafa kynnt sér reglur hennar og að
upplýsingar sem gefnar eru upp, séu réttar og í samræmi við reglur keppninnar.
Umsóknum þarf að skila í gegnum rafrænt umsóknarkerfi.
Lýsing á verkum:
I) Hljóðfæraleikarar: Einleiksverk með hljómsveit í fullri lengd.
II) Söngvarar: Einsöngsverk með hljómsveit að hámarki 25 mín.
4) Keppandi skal flytja sömu efnisskrá í keppninni og hann hyggst flytja á tónleikunum.
Opið er fyrir umsóknir í keppnina frá 1.september - 1. október.
Myndbandsupptökurnar mega vera að hámarki 6 mánaða gamlar.
Hver þáttur tónverks, hver aría eða hvert lag, skulu vera tekin upp í heild, þ.e. án klippinga.
Upptakan þarf að sýna keppandann allan tímann.
Með upptökunni skulu fylgja upplýsingar um fullt nafn umsækjanda ásamt kennitölu, námsstigi og skóla.
Einnig þarf að koma fram höfundur og titill tónverks/-verka.
Umsækjandi sendir læstan hlekk á upptökuna þar sem hún er vistuð, hvort sem að það er á
YouTube, Vimeo, Dropbox eða hverjum þeim stað sem hægt er að sækja hana.
Verkefnavalið miðast við hefðbundna hljómsveitarskipan og leikur meðleikari hljómsveitarpartinn í keppninni.
Allur upptökukostnaður og meðleikur í báðum umferðum keppninnar og er á ábyrgð og kostnað keppanda.
5) Forseti tónlistardeildar LHÍ skipar dómnefnd í samráði við framkvæmdastjóra Sinfóníuhljómsveitar Íslands.
Aðalhljómsveitarstjóri Sinfóníuhljómsveitarinnar á sjálfkrafa rétt á setu í nefndinni eða varamaður í hans stað.
Enginn dómnefndarmanna má hafa bein tengsl við þátttakendur í keppninni.
Miðað er við að í dómnefnd sitji fimm aðilar, en þeim má fjölga til þess að sérþekking um
einstaka hljóðfærahópa verði til staðar í nefndinni.
6) Úrskurður dómnefndar er endanlegur og óáfrýjanlegur.
Dómnefnd getur valið allt að fjóra þátttakendur til að koma fram á tónleikunum.
Ekki er boðið upp á endurgjöf að keppni lokinni.
Framkvæmdaaðili keppninnar ákveður röð þátttakenda í keppninni.
7) Keppnin er lokuð áheyrendum.
Reykjavík, september, 2020
Kristín Eysteinsdóttir
rektor Listaháskóla Íslands
Lára Sóley Jóhannsdóttir,
framkvæmdastjóri Sinfóníuhljómsveitar Íslands
Pétur Jónasson
deildarforseti í tónlist LHÍ
FLÝTILEIÐIR