Eftirfarandi aðilar voru ráðnir.
Massimo Santanicchia hefur verið ráðinn í stöðu lektors í arkitektúr við hönnunar- og arkitektúrdeild skólans. Þrír umsækjendur voru um starfið.
Massimo hefur margháttaða menntun á sviði arkitektúrs. Hann lauk fullnaðarnámi í arkitektúr frá IUAV School of Architecture í Feneyjum árið 2000, MA-gráðu í hýbýla- og borgarfræðum frá School of Architecture, Architectural Association í London 2002 og MSc-gráðu í svæðis- og skipulagsfræðum frá London School of Economics árið 2011. Árið 2005 hlaut hann löggildingu sem arkitekt á Íslandi og á Ítalíu árið 2008.
Massimo hefur verið stundakennari við Listaháskólann frá 2004, þar sem hann hefur kennt yfir 30 námskeið, leiðbeint fjölda nemenda þvert á faggreinar auk þess að taka þátt í uppbyggingu og þróun náms í arkitektúr. Í kennslu hefur hann sérhæft sig í rannsóknum á borgarumhverfinu og borgarfræðum ásamt því að kenna hönnunarfræði bæði á bakkalár- og meistarastigi. Auk þessa hefur hann hefur haldið fjölda fyrirlestra og námskeið í ýmsum háskólum og á opinberum vettvangi í Evrópu, Asíu, Ástralíu og S-Ameríku. Þá hefur hann ritað greinar, ritstýrt og gefið út efni um arkitektúr og skipulagsmál.
Í álitsgerð dómnefndar kemur fram að Massimo hafi góða yfirsýn yfir strauma og stefnur í faginu, en hann hefur starfað sem arkitekt, skipulagshönnuður, ráðgjafi og verkefnisstjóri á sviði arkitektúrs og skipulagsmála í Reykjavík, Jerúsalem, London og Mílanó. Verk hans hafa verið sýnd á opinberum vettvangi, auk þess sem hann hefur tekið þátt í hönnunarsamkeppnum og unnið til verðlauna eða fengið viðurkenningar í fjórum samkeppnum.
Linda Björg Árnadóttir hefur verið ráðin í stöðu lektors í fatahönnun. Fjórir umsækjendur voru um starfið.
Linda hefur yfirgripsmikla þekkingu á straumum og stefnum í hönnun og býr auk þess yfir víðtæku alþjóðlegu tengslaneti í faginu. Hún á að baki langan starfsferil þar sem hún hefur starfað ýmist sjálfstætt eða sem fatahönnuður og búningahönnuður fyrir ýmis hönnunarfyrirtæki á alþjóðavettvangi, s.s. Martine Sitbon, Rue du Mail, Anna Molinari, Marithé+Fracoise Birgaud, Byblos og hjá Borgarleikhúsinu. Frá árinu 2009 hefur hún verið listrænn stjórnandi og hönnuður hjá Scintilla textile collection, eigin hönnunarfyrirtæki. Verk hennar hafa verið sýnd á opinberum vettvangi hérlendis sem og í Evrópu og Bandaríkjunum, hvort tveggja hönnunarsýningum og sölusýningum. Hún hefur hlotið viðurkenningar og styrki fyrir verk sín, m.a. frá Aurora hönnunarsjóði, Menningarverðlaunum DV, Smirnoff International Fashion Award og Tækniþróunarsjóði. Þá hefur verið fjallað opinberlega um verk hennar hér á landi og erlendis. Hún er núverandi stjórnarmaður í Reykjavík Fashion Festival, auk þess sem hún situr í fagráði Fatahönnunarfélags Íslands.
Linda hlaut Advanced Diploma í Fatahönnun frá Studio Berçot, Fashion Design School í París árið 1997. Þá útskrifaðist hún með lokapróf í textíl frá Myndlista- og handíðaskóla Íslands árið 1995.
Linda hefur starfað sem aðjúnkt og fagstjóri námsbrautar í fatahönnun við Listaháskóla Íslands frá árinu 2000. Hún hefur byggt upp nám í fatahönnun á háskólastigi hér á landi, stjórnað námsbrautinni frá upphafi og útskrifað um 100 nemendur. Í álitsgerð dómnefndar kemur fram að hún hafi byggt upp víðtækt tengslanet fyrir nemendur skólans í iðnaðinum hérlendis og erlendis og gætt þess að þeir hljóti starfsreynslu hjá fremstu fyrirtækjum heims.
Garðar Eyjólfsson hefur verið ráðinn í stöðu lektors í vöruhönnun. Í starfinu felst að Garðar fer með fagstjórn námsbrautar í vöruhönnun, auk þess að sinna kennslu, rannsóknum og nýsköpun. Fimm umsækjendur voru um stöðuna.
Garðar hlaut BA Honours-gráðu í vöruhönnun við Central Saint Martins, University of the Arts í London árið 2009. Þá lauk hann meistaragráðu í samhengisfræðilegri hönnun við Hönnunarakademíuna í Eindhoven árið 2011. Hann hóf störf á þessu ári sem aðjúnkt í vöruhönnun við Listaháskóla Íslands, en auk þess hefur starfað sem stundakennari við Listaháskólann, Myndlistaskólann í Reykjavík og Iðnskólann í Hafnarfirði. Þá vann Garðar fyrir Iðnaðarráðuneytið og Hönnunarmiðstöð Íslands að rannsóknarvinnu fyrir gerð Hönnunarstefnu fyrir Ísland.
Verk Garðars hafa verið valin á alþjóðlegar sýningar m.a. í Slóveníu og Mílanó, auk þess sem útskriftarverk hans var valið framúrskarandi nemendaverk árið 2011. Þá birti tímaritið Volume Magazine meistararitgerð hans, “The New System”, árið 2011.
Í álitsgerð dómnefndar kemur fram að Garðar hafi áunnið sér góðan skilning á tengslum akademísks og faglegs starfs, rannsókna, hönnunar og kennslu, þrátt fyrir stuttan starfsferil. Hann hafi skýra sýn á þróun háskólanáms í vöruhönnun, og búi yfir yfirgripsmikilli þekkingu á straumum og stefnum í hönnun.
Birna Geirfinnsdóttur hefur verið ráðin í stöðu lektors í grafískri hönnun við hönnunar- og arkitektúrdeild skólans. Í starfinu felst að Birna fer með fagstjórn námsbrautar í grafískri hönnun, auk þess að sinna kennslu, rannsóknum og nýsköpun.
Birna lagði stund á fornám við Myndlistaskólann í Reykjavík áður en hún hóf nám í grafískri hönnun við Listaháskóla Íslands. Þaðan útskrifaðist hún með BA-gráðu árið 2006. Síðar hóf hún nám við Háskólann í Reading og lauk þaðan MA-gráðu í bókahönnun árið 2010.
Í álitsgerð dómnefndar kemur fram að Birna hafi umtalsverða reynslu af kennslu og mótaða sýn á kennsluhætti, en hún hefur verið stundakennari við Listaháskóla Íslands allt frá útskrift við skólann. Þá hafi hún sterka sérhæfða þekkingu á letri og bókagerð, og að verk hennari beri vitni um rannsóknarvinnu og vandvirkni.
Birna hefur að baki fjölbreytta starfsreynslu í faginu, ýmist sem sjálfstætt starfandi eða sem vertaki, m.a. hjá Íslensku auglýsingastofunni, Fraser Muggeridge studio í London, Vinnustofu Atla Hilmarssonar og auglýsingastofunni Fabrikkunni. Verk hennar hafa verið til sýnis á opinberum vettvangi í Kaupmannahöfn, London og á Íslandi. Þá ritstýrði hún Íslenskri sjónabók, sem kom út árið 2009 í samstarfi Listaháskólans, Heimilisiðnaðarfélagsins og Þjóðminjasafnsins. Sem stendur vinnur hún að þýðingu bókarinnar Das Detail in der Typografie eftir Jost Hochuli, í samstarfi við Gunnar Þór Vilhjálmsson, leturhönnuð.
Birna hefur hlotið viðurkenningu frá Félagi íslenskra teiknara (FÍT) fyrir bókahönnun, auk þess sem hún var starfandi á Vinnustofu Atla Hilmarssonar þegar stofan hlaut Menningarverðlaun DV 2008 og á Fabrikkunni þegar henni var veitt ÍMARK viðurkenning 2007. Þá hefur hún tekið sæti sem dómari í aðaldómnefnd fyrir FÍT verðlaunin og sinnt almennri dómgæslu fyrir sömu verðlaun.
Þau taka öll við starfi þann 1. ágúst næstkomandi.
