Hugarflug er árleg ráðstefna Listaháskólans sem haldin var í áttunda sinn árið 2019. Ráðstefnan er vettvangur starfsfólks, nemenda og annarra sem stunda rannsóknir á fræðasviði lista eða tengdra sviða til að mætast og spyrja spurninga, gera tilraunir og kynna verkefni sín. Ætlunin er þannig að skapa aðstæður til að nýjar tengingar og samtöl geti átt sér stað, og nýjir möguleikar til samstarfs á milli ólíkra sviða opnist.

 

 

Mikill fjöldi góðra tillagna bárust og var sérstaklega ánægjulegt hversu margar tillögur bárust frá starfandi lista- og fræðimönnum sem starfa á ólíkum vettvangi utan Listaháskólans, en samtal út fyrir skólann er mjög mikilvægur þáttur í því starfi sem þar fer fram.

 

Þema Hugarflugs árið 2019, líkami/líkamleiki veitti tækifæri til að skoða og hugleiða marga mismunandi þræði sem kalla á aukið rými í samtímanum.

 

Spurningar eins og hver eru tengslin á milli dýra, plantna og manna? Hver eru tengslin á milli líkamans og tækni? Hver eru tengslin á milli innri og ytri skynjunar líkamans? verða sífellt meira aðkallandi og kalla á athygli.

 

Rannsóknir á fræðasviði lista hafa beint sjónum sínum að þessum þráðum í auknum mæli og segja má að slíkar rannsóknir einkennist einmitt oft af því að unnið sé með líkamann, líkamleika og þá þekkingu sem býr í líkamanum á beinni hátt en önnur fræðasvið. Líkaminn staðsetur okkur í heiminum og veitir okkur aðgang að því að skilja og skynja þær aðstæður sem við erum í hverju sinni. Segja má að það sé einmitt þessi skilningur og skynjun sem listirnar beina sjónum sínum helst að og skapa þannig tækifæri til að skapa samtal, bæði inn á við innan hvers áhorfanda/heyranda og út á við út í samfélagið í heild.

 

Það var einmitt þessi sérstaða listrannsókna sem þátttakendur í Hugarflugi fengu tækifæri til að kynnast í þeim fjölbreyttu samræðuformum sem dagskráin bauð upp á.

Guðbjörg R. Jóhannesdóttir

Ásgerður Gunnarsdóttir

Berglind María Tómasdóttir

Garðar Eyjólfsson

Hildur Bjarnadóttir

Páll Haukur Björnsson

Verkefnisstjóri: Ólöf Hugrún Valdimarsdóttir

 

Umsjón með listrænni uppsetningu: Ástríður Jónsdóttir