Málþing um samfélagsleg áhrif birtingarmynda í listum - upptaka

Á dögunum fór fram málþing í Þjóðleikhúsinu um samfélagsleg áhrif birtingarmynda í listum og þar talað um hlutverk lista og inngildingu jaðarhópa.

Málþingið var haldið af Þjóðleikhúsinu, í samstarfi við ÖBÍ réttindasamtök, Landssamtökin Þroskahjálp, Bandalag íslenskra listamanna, Sviðslistasamband Íslands og Listaháskóla Íslands.

Málþingið var tekið upp og má finna hlekk á upptökuna hér: https://vimeo.com/lhisvidslistir/samfelagslegahrifbirtingamynda

Hér að neðan er hægt að lesa um málþingið:

Að undanförnu hefur mikil umræða átt sér stað um leikhúsið og sviðsetningu raunveruleikans í listum. Kastljósinu hefur sérstaklega verið beint að inngildingu og sýnileika fatlaðs fólks og annarra minnihlutahópa í listum. Umræðan er sprottin af skoðanaskiptum um framsetningu á leikpersónu, sem er ungur fatlaður maður, í sýningunni Sem á himni. 

Þjóðleikhúsið, í samstarfi við ÖBÍ réttindasamtök, Landssamtökin Þroskahjálp, Bandalag íslenskra listamanna, Sviðslistasamband Íslands og Listaháskóla Íslands, efnir til málþings um samfélagslegt hlutverk lista, þar sem velt verður upp spurningum um sögurnar sem sagðar eru, um framsetningu þeirra og það hvernig ólíkum hópum er gert kleift að njóta lista og taka þátt í sköpun listaverka. 

Listafólk vill leggja við hlustir og eiga samtal við sem flesta í samfélaginu með það að markmiði að auka skilning, víkka sjóndeildarhringinn og brúa bilið milli ólíkra sjónarmiða. Því vonast skipuleggjendur eftir þátttöku allra sem áhuga hafa á uppbyggilegu samtali um þetta brennandi málefni. 

Leikhúsið er listform sem speglar hinn persónulega og samfélagslega veruleika með margvíslegum hætti, og segir fjölbreyttar sögur. Með störfum sínum kappkostar listafólk að vekja til umhugsunar, hreyfa við fólki og efna til umræðu um ólíkar hliðar mannlegrar tilveru, og þannig getur listin orðið hreyfiafl til góðra verka, unnið gegn aðgreiningu og verið sameinandi afl í sundruðum heimi.