EINKASÝNINGARÖÐ MA ÚTSKRIFTARNEMA Í MYNDLIST 2023

Í febrúar og mars fer af stað röð einkasýninga meistaranema í myndlist. Sýningarnar eru undirbúningur fyrir útskriftarsýningu sem opnar 13. maí í Nýlistasafninu í Marshallhúsinu á Granda. Í hópnum eru 7 nemendur með fjölbreyttan bakgrunn, frá ólíkum heimshlutum.

 

Einkasýningarnar eru haldnar í galleríum Listaháskólans við Laugarnesveg 91 og nemendagalleríinu RÝMD sem staðsett er í Völvufelli 13-21 í Breiðholti. Sýningarnar standa yfir í eina viku í senn og er opnun aðra hvora viku frá og með 24. og 25. febrúar fram til loka mars. Nemendur vinna að einkasýningunum undir leiðsögn ólíkra leiðbeinenda sem allir eru leiðandi í sínu fagi en einkasýningarnar eru undirbúningur fyrir útskriftarsýningu sem opnar í Nýlistasafninu 14. maí. Einkasýningarnar veita nemendum tækifæri til að prófa nýjar hugmyndir og hvernig best megi útfæra þær í því rými og samhengi sem þeim hefur verið úthlutað. Í byrjun vikunnar eftir opnun sýningarinnar eiga sér stað samræður um það sem fyrir augum ber á sýningunni undir stjórn utanaðkomandi sérfræðings á sviði myndlistar. Í þessum umræðum taka þátt samnemendur í mastersnámi í myndlist og sýningargerð ásamt leiðbeinendum og fagstjóra MA námsins. Í framhaldi af einkasýningunni tekur við vinna með sýningarstjóra útskriftarsýningarinnar í Nýlistasafninu sem ásamt kennurum skólans leiðbeinir og styður við ferlið á þróun verka til mastersgráðu í myndlist.