Föstudaginn 19. Nóvember frumsýna nemendur tónlistardeildar verkið á Rappresentatione di Anima, et di Corpo eftir ítalska tónskáldið Emilio de´Cavalieri.
„Verkið Rappresentatione di Anima, et di Corpo er merkilegt að svo mörgu leyti – það var frumflutt í Róm árið 1600 og þetta er talin fyrsta óratorían eða dramatíska verkið fyrir söngvara og hljómsveit. Sumir vilja jafnvel kalla það fyrstu óperuna sem samin hefur verið, þar sem notuð voru búningar og leiktjöld til að auka áhrif hjá áhorfendum.“ segir Hanna Dóra Sturludóttir fagstjóra söngbrautar og einn leiðbeinenda verkefnisins. „Umfjöllunarefnið er samtal sálarinnar og líkamans um hið jarðneska líf og það er merkilegt að skoða það, bæði í sögulegu og nútímalegu samhengi. Í verkinu leika Tíminn, Líkaminn, Sálin, Viskan, Heimurinn, Lostinn, Jarðneska lífið og Góðu ráðin helstu hlutverkin en einnig koma þar fyrir englar, blessaðar sálir og glataðar sálir.“
Spurð út í val á verkefni segir Hanna Dóra hún hafi sjálf kynnst Rappresentatione di Anima, et di Corpo á námsárunum í Berlin og hún viti ekki til þess að það hafi verið flutt áður á Íslandi. Það hafi því orðið fyrir valinu og legið vel við þar sem það inniheldur mörg hlutverk sem sé auðvelt að skipta á milli söngvara ásamt því að flytjendur þurfa að tileinka sér stíl og reglur barrok-tónlistar. Um leið sé verkið aðgengilegt og fallegt áheyrnar. Kórinn leikur einnig stórt hlutverk í flutningnum og nýtir de´Cavalieri hann til að styðja við söguna, í gegnum hann eru aðal atriði hennar dregin saman og skerpt á þeim boðskap sem sagan flytur okkur.
