Sigurður Oddsson
Rannsóknir og hönnun
Sigurður Oddsson er grafískur hönnuður og listrænn stjórnandi (e.art director) sem hefur verið starfandi í faginu í um tíu ár eða allt frá því að hann útskrifaðist úr Listaháskóla Íslands árið 2008. Sigurður mun halda fyrirlestur um rannsóknir sínar og hönnun 5. mars næst komandi klukkan 12:15 í Listaháskóla Íslands, Þverholti 11, fyrirlestrarsal A.
Sigurður hefur starfað sem listrænn stjórnandi (e. art director) hjá auglýsingastofunni Jónsson & Lemacks en þar hefur hann sérhæft sig í mörkun á fyrirtækjum; allt frá einkennum fyrir veitingastaði á borð við Skelfiskmarkaðinn og Kex Hostel til stærri fyrirtækja á borð við Víking brugghús, Þjóðminjasafn Íslands og Icelandic Lamb.
Sigurður hefur jafnan unnið sjálfstætt að eigin verkefnum meðfram vinnu. Þar ber helst að nefna verkefni fyrir ýmsa tónlistarmenn, t.d. Högna, Sturla Atlas og Young Karin - mörkun fyrir menningarverkefni og viðburði, svo sem fyrir Útvarp 101, Everybody's Spectacular og We Live Here, auk fjöldann allan af bókakápum og myndskreytingum. Þar að auki hefur Sigurður lagt mikla stund á eigin rannsóknarverkefni og sýningar og verið áberandi á HönnunarMars síðustu ár.
Fyrirlesturinn er öllum opinn!
Með Gestagangi er ætlunin að veita áhugasömum innsýn í áhugaverð verkefni og rannsóknir í hönnun og arkitektúr. Fyrirlesararnir eiga það sameiginlegt að vera stundakennarar eða erlendir gestakennarar við Hönnunar- og arkitektúrdeild. Allir eiga þeir það sameiginlegt að hafa vakið athygli fyrir einstök verkefni á sviði hönnunar eða arkitektúrs og hafa látið til sín taka á alþjóðlegum vettvangi.
