Arnar Freyr Sigurðsson

Alþing er blendingur þings og dómskerfis sem tekur á málum ómennskra fyrirbæra og ljáir þeim rödd og vettvang til að tjá sig um sín viðhorf og gildi. 

Þingmenn og talsmenn fyrirbæranna dvelja með náttúruöflunum og mynda sterkari tengsl við hlutbundinn veruleika Þyrilsness. Arkitektúr þingsins leysir tímann úr læðingi og gerir notendum kleift að komast í snertingu við ólíka tímaskala, allt frá jarð- og stjarnfræðilegum tíma yfir í líffræðilegan tíma. Vistarverur þingmanna og fulltrúa fylgja flæði landslagsins og snerta jörðu létt. Þær veita mismunandi lífverum skjól og aðsetur á flötum sínum. Alþing varpar því ljósi á og undirstrikar gerendamátt náttúru, dýra, efnis og annarra ómennskra gerenda í margvíslegu samhengi fortíðar, nútíðar og framtíðar.