Um Vöruhönnun

Í grunninn vinna vöruhönnuðir að megninu til með nokkra lykilþætti sem eiga sér mismunandi birtingar­myndir eftir eðli hlutanna. Lykilhugtök eins og efni, tæki og umbreyting eru hugtök sem koma aftur og aftur fyrir í vinnu vöruhönnuða. Allur lífhringur efnis er rannsakaður til þess að vöruhönnuður sé meðvitaður um umbreytingu frá uppruna efnis til endaloka þess. Í þessu sambandi er hugtakið lífhring­ur efna rannsakaður í náttúrunni og hvernig inngrip mannskepnunnar hefur áhrif á hringrás náttúrunn­ar. Samspil efna og tækja er rannsakað til þess að starfandi vöruhönnuðir framtíðarinnar geti greint og skilið dýnamískt samspil efna og tækja til sköpunar á vörum. Farið er yfir greinarmun á iðnaðarfram­leiðslu og handverksframleiðslu og samtali þess á milli miðað við breyttar áherslur samtímans. Áhersla er lögð á dýpri skilning á áhrifum og þýðingu þess hvernig vara verður til, frekar heldur en að notagildi eitt og sér sé takmarkið. Áhersla samtímans setur því spurningarmerki við verkferla, endurskilgreinir þá og endurnýjar.

Áhersluspurningin er „af hverju“ frekar en „hvernig“? Þessum grunni er síðan speglað aftur og aftur á mismunandi snertipunkta hinna ýmsu ferla í gegnum námið, hvort sem það eru lágtækni­ eða hátækniferlar, keramík og viður eða þrívíddar­prentun og laserskurður, svo dæmi séu tekin.

Í mótvægi við þessa raunvísindalegu nálgun er lögð mikil áhersla á dýpri rannsóknir á sértækum aðstæðum sem gefa kost á nýjum tækifærum til þróunar á vörum, þjónustu eða kerfum, þar sem snertifletir varpa upp spurningum um félagsfræði­leg og hagfræðileg áhrif. Sem dæmi má nefna námskeiðin Stefnumót við bændur og Staðbundin framleiðsla sem byggja að stórum hluta á rann­sóknarvinnu á sértæku samhengi þróunar afurða og framleiðsluferla.

 

Nafn brautar: Vöruhönnun
Nafn gráðu: BA
Einingar: 180 ECTS
Lengd náms: 6 annir – 3 ár
Fegurðin í náminu felst í því hversu opið það er. Hver einstaklingur getur fundið sínu áhugasviði farveg en í náminu lærir maður að nýta sér ákveðin tæki og tól í verkefnum sínum. Þau verða því jafn ólík og einstaklingarnir eru margir. Námið er mjög persónulegt og það er það sem gerir ferlið svo þroskandi.
 
Að stunda nám í vöruhönnun er eitt mest krefjandi verkefni sem ég hef tekið mér fyrir hendur. Á sama tíma hefur það styrkt mig sem manneskju, eflt gagnrýna hugsun mína, veitt mér ný tækifæri og umkringt mig fullt af frábæru fólki.

Heiðdís Inga Hilmarsdóttir, vöruhönnuður.

Frá fagstjóra

Í tengslum við áherslubreytingu vöruhönnuða frá því "hvernig" vara verður til yfir í "af hverju" vara verður til, er ávallt mikilvægt fyrir vöruhönnuði að geta kynnt verk sín vel bæði í máli og myndum og geta rökstutt skoðanir sínar á opinberum vettvangi sem gild gagnrýnin rödd á þau kerfi sem tengjast faginu. Nemendur fá þjálfun í að miðla verkum í mismunandi miðlum, meðal annars í texta, teikningum, smíði frumgerða, ljósmyndun og kvikmyndun.

Rúna Thors, aðjúnkt og fagstjóri í vöruhönnun.