Meistaranám í söng- og hljóðfærakennslu

Brautin er ætluð þeim sem lokið hafa bakkalárgráðu eða sambærilegu námi í tónlist. Námið er einnig tilvalin leið fyrir tónlistarkennara sem vilja bæta við þekkingu sína og færni í kennarastarfinu.

Námið miðar að því að þjálfa söngvara og hljóðfæraleikara til kennslu ásamt því að efla með þeim færni og fræðilegan grunn til að miðla þekkingu sinni á ólíkum vettvangi. Söng- og hljóðfærakennaranámið er fjölbreytt nám sem byggist á einkatímum í valinni sérgrein, námskeiðum í kennslu- og uppeldisgreinum, samhliða þjálfun og miðlun á vettvangi.

Námið er afar einstaklingsmiðað og nemandanum gefið rými til að móta það eftir eigin áhugasviði.

Áhersla er lögð á að nemendur öðlist skilning og þekkingu á starfi söng- og hljóðfærakennarans. Þeir geti skipulagt nám út frá námskrám, valið gögn, kennslu- og matsaðferðir við hæfi. Kennsla og miðlun eru einnig skoðuð í víðara samhengi og nemendur hvattir til að setja fram eigin sýn og hugmyndir um tónlistarnám og námsframboð í samfélaginu.

Skipulag námsins miðar að því að þjálfa afburða söng- og hljóðfærakennara til kennslu í sérgrein sinni, en jafnframt nýta þá möguleika sem gefast með samstarfi við nemendur listkennsludeildar þar sem listafólk úr ýmsum listgreinum vinnur saman. Áhersla er lögð á skapandi þætti tónlistarkennslunnar s.s. spuna, tónsmíðar og útsetningar með fjölbreyttum námskeiðum. Einnig er lögð áhersla á að efla færni nemenda með markvissri þjálfun í að setja sér persónuleg og fagleg markmið sem reyna á sjálfstæði og úthald ásamt tjáningar- og miðlunarhæfni. Þó hver nemandi einbeiti sér að sinni sérgrein á sér stað stöðugt samtal, sem opnar dyr fyrir samvinnu og nýjum möguleikum í tónlistarkennslu.

Nafn brautar: Meistaranám í söng- og hljóðfærakennslu
Nafn gráðu: M.Mus.Ed.
Einingar: 120 ECTS
Lengd náms: 4 annir – 2 ár
Mastersnám í hljóðfæra- og söngkennslu hefur verið mér dýrmætt. Ég hef fengið tækifæri til að láta draumaverkefnin verða að veruleika ásamt því að móta mína starfskenningu frekar. Tenglsanetið við aðra kennaranema hefur einnig verið gríðarlega innspýting og opnað nýja möguleika í frekari samvinnuverkefni. Ég mæli með náminu! 
 

 

Sigrún Kristbjörg Jónsdóttir

Frá fagstjóra

Námsbrautin er kjörinn valkostur fyrir nemendur sem hafa útskrifast úr grunnnámi BMus.Ed og vilja leggja stund á áframhaldandi nám. Námið er einnig tilvalin leið fyrir tónlistarkennara sem vilja bæta við þekkingu sína og færni í kennarastarfinu.

Auk kennslufræðitengdra faga gefst nemendum brautarinnar kostur á að þjálfa sig í söng og hljóðfæraleik kjósi þeir það auk þess sem horft er til þjálfunar í skapandi starfi í tónlistarnámi barna og ungmenna. Áhersla er lögð á einstaklingsmiðað nám enda koma nemendur með mjög fjölbreyttan bakgrunn í námið.

Námið er skipulagt í náinni samvinnu við listkennsludeild LHÍ og geta nemendur valið úr mjög fjölbreyttum námskeiðum yfir námstímann.