Ásdís Kalman

 

 

Meistaraverkefnið ,,Börn í tómarúmi“ er byggt á listasmiðjum sem ég hélt í samstarfi við Rauða kross Íslands og Þjóðminjasafn Íslands.

 

Listasmiðjurnar fóru fram í húsnæði Rauða krossins. Þátttakendur voru hælisleitandi börn og ungmenni staðsett á stór-Reykjavíkursvæðinu.

 

Fyrri hluti ritgerðarinnar fjallar um fyrri reynslu mína sem kennari og listamaður sem hefur nýst mér við gerð smiðjunnar á meðan seinni hlutinn fjallar um smiðjurnar sjálfar og fræðin sem liggja til grundvallar.

 

Markmið smiðjanna var þríþætt:

 

Í fyrsta lagi að skapa aðstæður til að virkja og hvetja unga hælisleitendur til að tjá sig í myndrænu formi án orða og í öðru lagi að bjóða þátttakendunum að taka þátt í Barnamenningarhátíð með því að setja upp sýningu í Þjóðminjasafninu.

 

Í þriðja lagi var markmiðið var að halda sýningu í sambandi við Barnamenningarhátíð og þar með gera börnin sýnilegri í nærsamfélaginu, gefa smá innsýn á hagi þeirra og vekja áhuga og umræðu um málefni barna á flótta. Með því að gefa þeim rödd á þennan hátt skapaðist forsenda til valdeflingar.

 

Markmið þessa verkefnis er að sýna fram á að reynsla þessara einstaklinga skiptir máli. Því vildi ég gefa þeim tækifæri til að taka þátt í þessu verkefni á sínum forsendum.